ប្រធានទីភ្នាក់ងារទេសន្តរប្រវេសន៍របស់អង្គការសហប្រជាជាតិ បានព្រមានកាលពីថ្ងៃអង្គារថា ចំនួនជនភៀសខ្លួនស៊ីរីដែលចាកចេញពីប្រទេសលីបង់ ទំនងជានឹងបន្តកើនឡើង ដោយសារម្ចាស់ជំនួយ កាត់បន្ថយជំនួយ ខណៈដែលសម្ពាធកើនឡើងចំពោះការមកដល់របស់ពួកគេ នៅលើកោះមេឌីទែរ៉ាណេនៃប្រទេសកោះស៊ីប។

លោក Amy Pope អគ្គនាយកនៃអង្គការទេសន្តរប្រវេសន៍អន្តរជាតិ បាននិយាយថា ប្រជាជនស៊ីរីប្រហែល ៣.000នាក់ បានចាកចេញពីប្រទេសលីបង់ ចាប់តាំងពីខែមករា បើធៀបនឹងចំនួន ៤.៥០០នាក់សម្រាប់ពេញមួយឆ្នាំមុន។ ពួកគេជាច្រើន បានធ្វើដំណើរទៅកាន់ប្រទេសកោះស៊ីប ដែលមានចម្ងាយប្រហែល ១១០ ម៉ាយ ( ១៨០គីឡូម៉ែត្រ)។

ជាការឆ្លើយតប ប្រទេសកោះស៊ីប បានផ្អាកដំណើរការពាក្យសុំសិទ្ធិជ្រកកោនដោយជនជាតិស៊ីរី នៅដើមខែនេះ ដោយសារចំនួនដ៏ច្រើន។ អាជ្ញាធរនៃប្រទេសកោះស៊ីប បានបញ្ជូននាវាល្បាតរបស់នគរបាល នៅខាងក្រៅដែនទឹកលីបង់ ដើម្បីរារាំងទូកជនភៀសខ្លួនដែលព្យាយាមធ្វើដំណើរទៅកាន់ប្រទេសនេះ។

លោក Pope បានប្រាប់សារព័ត៌មាន AP ថា រដ្ឋាភិបាលនានា កំពុងកាត់បន្ថយការផ្តល់មូលនិធិដល់ភ្នាក់ងារដែលធ្វើការជាមួយនឹងមនុស្សដែលបានភៀសខ្លួនចេញពីប្រទេសស៊ីរី ដែលបានបំផ្លិចបំផ្លាញដោយសង្រ្គាមស៊ីវិលអស់រយៈពេលជាង ១៣ឆ្នាំ ហើយថា នេះកំពុងធ្វើឲ្យរឿងនេះ កាន់តែអាក្រក់ឡើងៗ។ ក្នុងពេលជាមួយគ្នានេះ សហគមន៍លីបង់មួយចំនួន កំពុងធុញទ្រាន់នឹងការធ្វើជាម្ចាស់ផ្ទះ។

លោក Pope បានបន្ថែមថា៖ «ក្តីបារម្ភរបស់ខ្ញុំ គឺថា យើងនឹងឃើញវាកាន់តែពិបាកសម្រាប់ប្រជាជនស៊ីរី ក្នុងការស្នាក់នៅដោយសុវត្ថិភាព នៅក្នុងប្រទេសលីបង់ ហើយនៅពេលដែលមនុស្ស មិនអាចស្នាក់នៅដោយសុវត្ថិភាព នៅកន្លែងតែមួយ ពួកគេធ្វើអ្វីដែលមនុស្សគ្រប់រូប នឹងធ្វើ គឺសម្លឹងមើលទៅកន្លែងដែលពួកគេអាចទៅបាន»។