ប្រព័ន្ធផ្សព្វផ្សាយក្នុងស្រុក បានរាយការណ៍កាលពីថ្ងៃអង្គារថា អាជ្ញាធរនៅក្នុងប្រទេសកាហ្សាក់ស្ថាន បានចាប់ខ្លួនអតីតរដ្ឋមន្ត្រីមហាផ្ទៃម្នាក់ពាក់ព័ន្ធនឹងការបង្រ្កាបដ៏សាហាវរបស់នគរបាលទៅលើភាពចលាចលដែលបានរួបរឹតប្រទេសនេះ ក្នុងឆ្នាំ២០២២។

ការិយាល័យអគ្គរដ្ឋអាជ្ញា បានប្រកាសកាលពីថ្ងៃចន្ទថា លោក Erlan Turgumbayev ត្រូវបានឃុំខ្លួនដោយចោទប្រកាន់ពីបទ«រំលោភអំណាច និងសិទ្ធិអំណាចផ្លូវការ ដែលបណ្តាលឲ្យមានផលវិបាកធ្ងន់ធ្ងរ» នៅក្នុងការបង្ក្រាបនេះ។ ក្រសួងមហាផ្ទៃ  គឺទទួលបន្ទុកលើកម្លាំងនគរបាល។ លោក Turgumbayev ត្រូវបានដកតំណែង មួយខែបន្ទាប់ពីភាពចលាចលនោះ។

នៅទីក្រុង Almaty ដែលជាទីក្រុងធំបំផុតរបស់ប្រទេសនេះ ការតវ៉ា បានប្រែក្លាយទៅជាហិង្សា ហើយប្រធានាធិបតី Kassym-Jomart Tokayev បានចេញបញ្ជាបាញ់សម្លាប់ ខណៈដែលក្រុមបាតុករ បានសម្រុកចូលអគាររដ្ឋាភិបាល។ ក្រុមមន្ត្រី បាននិយាយថា មនុស្ស ២៣៨នាក់ ត្រូវបានសម្លាប់។

ភាពចលាចល បានចាប់ផ្តើម នៅក្នុងទីក្រុង Zhanaozen កាលពីថ្ងៃទី ២ ខែមករា ឆ្នាំ ២០២២ នៅពេលដែលអ្នកស្រុក បានតវ៉ាអំពីការកើនឡើងយ៉ាងខ្លាំងនៃតម្លៃប្រេងឥន្ធនៈរាវ ដែលជាទូទៅ ត្រូវបានប្រើប្រាស់ជាឥន្ធនៈសម្រាប់យានយន្ត នៅក្នុងប្រទេសកាហ្សាក់ស្ថាន។

ការតវ៉ានោះ បានវិវឌ្ឍន៍ទៅជាការរិះគន់ពីអំពើពុករលួយ និងវិសមភាពសេដ្ឋកិច្ច ក្រោមការដឹកនាំរបស់អតីតមេដឹកនាំ លោក Nursultan Nazarbayev ដែលក្រុមអ្នករិះគន់ បានចោទប្រកាន់លោកថា បានចំណេញពីធនធានថាមពលដ៏ច្រើនរបស់ប្រទេសនេះ បន្ទាប់ពីចូលកាន់តំណែង ក្នុងឆ្នាំ ១៩៩១។