ភ្នំពេញ ៖ គិតមកដល់បច្ចុប្បន្ននេះ រាជរដ្ឋាភិបាលកម្ពុជា អង្គការសង្គមស៊ីវិល និងដៃគូពាក់ព័ន្ធ នៅតែបន្តកិច្ចសហការជាមួយគ្នា លើការជំរុញឲ្យមានការផ្លាស់ប្តូរជាបណ្តើរៗនូវមធ្យោបាយដឹកជញ្ជូនកម្មករនិយោជិត ឲ្យស្របតាមបទដ្ឋានបច្ចេកទេស និងផាសុកភាពជាងមុន ជាពិសេសអនុវត្តឲ្យបានមុនត្រឹមឆ្នាំ២០២៧។

​លោកជំទាវ មឹន មាណវី រដ្ឋលេខាធិការក្រសួងសាធារណការ និងដឹកជញ្ជូន និងជាអគ្គលេខាធិការគណៈកម្មាធិការជាតិសុវត្ថិភាពចរាចរណ៍ផ្លូវគោក នៅក្រោយចប់ពិធីបិទសិក្ខាសាលាថ្នាក់ជាតិ ស្តីពីរថយន្តដឹកកម្មករនិយោជិតដែលមានសុវត្ថិភាពប្រសើរជាង បង្កើនសកម្មភាពរួមគ្នា និងការវិនិយោគក្នុងការលើកកម្ពស់សុវត្ថិភាពចរាចរណ៍សម្រាប់កម្មករនិយោជិតកម្ពុជា កាលពីរសៀលថ្ងៃទី៣០ ខែមេសាកន្លងទៅ បានមានប្រសាសន៍ប្រាប់ព័ត៌មាន ប៊ីធីវី ថា នៅចុងឆ្នាំ២០២៤នេះ សង្ឃឹមថា ដោយសារការខិតខំរួមគ្នា ជាពិសេសខាងក្រសួងការងារ និងបណ្តុះបណ្តាលវិជ្ជាជីវៈ បេឡាជាតិសន្តិសុខសង្គម (ប.ស.ស.) ហើយនិងក្រសួងសាធារណការ និងដឹកជញ្ជូន ធ្វើយ៉ាងណានឹងធ្វើឲ្យប្រសើរឡើងក្នុងការដឹកជញ្ជូនកម្មករពីឈរ មកអង្គុយឲ្យបានគ្រប់ៗគ្នា ដើម្បីកាត់បន្ថយការស្លាប់ និងការរងរបួសនៅលើដងផ្លូវដោយសារគ្រោះថ្នាក់ចរាចរណ៍។

លោកជំទាវ បានបង្ហើបឲ្យដឹងទៀតថា ចំពោះការងារខាងលើនេះ រាជរដ្ឋាភិបាលកំពុងប្រឹងប្រែង ហើយវិស័យឯកជនមួយចំនួនក៏មានគម្រោងនាំចូលរថយន្តដែលមានសុវត្ថិភាព និងការពារបរិស្ថានផងដែរ ដើម្បីធានាបាននូវសុខសុវត្ថិភាពជូនដល់កម្មករនិយោជិតក្នុងការធ្វើដំណើរពីផ្ទះមកកន្លែងការងារ និងពីកន្លែងការងារត្រឡប់ទៅផ្ទះវិញ។

លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា បានឲ្យ ប៊ីធីវី ដឹងដែរថា លោកសូមវាយតម្លៃខ្ពស់ចំពោះការខិតខំប្រឹងប្រែងប្រកបដោយស្មារតីទទួលខុសត្រូវរបស់ស្ថាបនរាជរដ្ឋាភិបាល ជាពិសេសអង្គភាពដែលទទួលខុសត្រូវផ្ទាល់ គឺបេឡាជាតិសន្តិសុខសង្គម ដែលបានខិតខំក្នុងការងារលើកកម្ពស់សុវត្ថិភាពចរាចរណ៍សម្រាប់កម្មករនិយោជិត ក្នុងនោះក៏មានផ្នែកមួយទាក់ទងជាមួយការដឹកជញ្ជូនកម្មករនិយោជិតតាមរថយន្តដឹកជញ្ជូនរួម។ ជាមួយនេះ លោកក៏បានសម្តែងការអរគុណដល់រាជរដ្ឋាភិបាលអាណិត្តថ្មីទី៧ ដែលបានណែនាំនិងចាត់ជាអាទិភាពមួយ គឺធ្វើម៉េចជំរុញមានការប្តូរថយន្តជាបណ្តើរៗតាមរយៈការសិក្សា ការសហការជាមួយដៃគូពាក់ព័ន្ធ ដើម្បីឲ្យកម្មករនិយោជិតអាចទទួលបាននូវមធ្យោបាយធ្វើដំណើរប្រកបដោយផាសុកភាព សមរម្យ និងមានសុវត្ថិភាព។

សូមបញ្ជាក់ផងដែរថា ចាប់តាំងពីឆ្នាំ២០១៧ អង្គការមូលនិធិបង្ការរបួសអាស៊ី (AIP) បានសហការជាមួយស្ថាប័នរាជរដ្ឋាភិបាលពាក់ព័ន្ធ ជាពិសេសបេឡាជាតិសន្តិសុខសង្គម នៃក្រសួងការងារ និងបណ្តុះបណ្តាលវិជ្ជាជីវៈ និងគណៈកម្មាធិការជាតិសុវត្ថិភាពចរាចរណ៍ផ្លូវគោកក្នុងការបង្កើនការរួមចំណែកអនុវត្តនូវសកម្មភាពជាបន្តបន្ទាប់ ទាំងនៅថ្នាក់ជាតិ ថ្នាក់ក្រោមជាតិ និងនៅកម្រិតរោងចក្រផ្ទាល់ដើម្បីលើកកម្ពស់សុវត្ថិភាពចរាចរណ៍សម្រាប់កម្មករនិយោជិត ជាពិសេសក្នុងវិស័យកាត់ដេរសម្លៀកបំពាក់ និងផលិតស្បែកជើង៕

អត្ថបទ ៖ ឈិត បូរ៉ាវី