ភ្នំពេញ៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញជាអធិបតីដ៏ខ្ពង់ខ្ពស់ សម្ពោធដាក់ឱ្យដំណើរការជាផ្លូវការរោងចក្រផ្គុំ និងដំឡើងរថយន្តតូយ៉ូតា ក្នុងតំបន់សេដ្ឋកិច្ចពិសេស រ៉ូយ៉ាល់គ្រុប ភ្នំពេញ នៅព្រឹកថ្ងៃទី០២ ខែឧសភា ឆ្នាំ២០២៤។

ប្រសាសន៍សំខាន់ៗរបស់សម្តេចធិបតី ហ៊ុន ម៉ាណែត ដែលមានខ្លឹមសារដូចខាងក្រោម៖

-សម្តេចធិបតី ហ៊ុន ម៉ាណែត៖ បច្ចុប្បន្នកម្ពុជាមានរោងចក្រដំឡើងរថយន្តចំនួន ៦ បូករួមទាំងរោងចក្ររោងចក្រដំឡើងរថយន្តរបស់តូយ៉ូតា ដែលសម្ពោធនៅព្រឹកនេះ មានទុនជិត ៣៧ លានដុល្លារ។

-សម្តេចធិបតី ហ៊ុន ម៉ាណែត បញ្ជាក់ថា ការបង្កើតរោងចក្រដំឡើងរថយន្តរបស់តូយ៉ូនៅកម្ពុជា គឺជាឱកាសក្នុងការផ្ទេបច្ចេកវិទ្យាទំនើបៗពីប្រទេសជប៉ុនមកកម្ពុជា។ សម្ដេចបានលើកទឹកចិត្តដល់ក្រុមហ៊ុន ឱ្យបើកថ្នាល់បណ្ដុះបណ្ដាល និងផ្ដល់ឱកាសដល់យុវជនដែលកំពុងរៀនជំនាញវិជ្ជាជីវៈ អាចមកហាត់ការនៅក្នុងក្រុមហ៊ុនដោយផ្ទាល់។

-សម្តេចធិបតី ហ៊ុន ម៉ាណែត៖ ក្នុងការអភិវឌ្ឍសង្គម សេដ្ឋកិច្ចជាតិ រាជរដ្ឋភិបាលតែងតែចាត់ទុកវិស័យឯកជនជាក្បាលម៉ាស៊ីន ក្នុងការជួយជំរុញកំណើនសេដ្ឋកិច្ចជាតិ។

-សម្តេចធិបតី ហ៊ុន ម៉ាណែត បញ្ជាក់ថា បច្ចុប្បន្ន កម្ពុជាកំពុងឈានដល់ការអនុវត្ត និងអភិវឌ្ឍន៍វិស័យកម្មន្តសាល ដូច្នេះកម្ពុជាត្រូវមានសមត្ថភាពក្នុងការផលិត ផលិតផលពាក់កណ្ដាលសម្រេច និងផលិតផលសម្រេចដើម្បីនាំចេញ។

-សម្តេចធិបតី នាយករដ្ឋមន្រ្ដីនៃកម្ពុជា ប្រកាសស្វាគមន៍វិស័យឯកជន និងក្រុមហ៊ុនរបស់ជប៉ុន បន្តមកវិនិយោគ និងបណ្ដាក់ទុននៅកម្ពុជាបន្តទៀត។

-សម្តេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា ប្រកាសថ្លែងអំណរគុណដល់រដ្ឋាភិបាល និងប្រជាជនជប៉ុន ដែលជឿជាក់ និងមានទំនុកចិត្តចំពោះកម្ពុជា បានបន្តមកបណ្ដាក់ទុនវិនិយោគនៅកម្ពុជាជាបន្តបន្ទាប់។

-សម្តេចធិបតី ហ៊ុន ម៉ាណែត លើកទឹកចិត្តឱ្យបណ្ដាក្រុមហ៊ុន ជាពិសេសក្រុមហ៊ុនដែលទើបវិនិយោគថ្មីៗនៅក្នុងប្រទេសកម្ពុជា សូមចូលរួមប្រើប្រាស់វត្ថុធាតុដើម ដែលមាននៅក្នុងប្រទេសកម្ពុជាដែលកំពុងមានស្រាប់។

-សម្តេចធិបតី ហ៊ុន ម៉ាណែត ជំរុញដល់ក្រសួង ស្ថាប័នពាក់ព័ន្ធត្រូវផ្ដល់ការគាំទ្រដល់ការវិនិយោគនានានៅកម្ពុជា។ ជាមួយគ្នានេះសម្ដេចធិបតី បានលើកទឹកចិត្តដល់បងប្អូនដែលជានិយោជិតខ្មែរ កំពុងបំពេញការងារនៅក្នុងរោងចក្រដំឡើងរថយន្តតូយ៉ូតា ត្រូវខិតខំពង្រឹងសមត្ថភាព និងចាប់យកឱកាសការងារនេះឱ្យបានល្អ។