គ្រួសារជនជាតិហៃទីរាប់សិបនាក់ បានរកឃើញទីជម្រកនៅសាលារៀនក្នុងទីក្រុងព័រអូប្រាំង ដែលបានប្រែក្លាយទៅជាជំរំមួយ ខណៈពួកគេរង់ចាំឲ្យអំពើហិង្សារបស់ក្រុមជនអន្ធពាលថយចុះ។ ក្រុមប្រឹក្សាប្រធានាធិបតីបណ្តោះអាសន្នមួយត្រូវបានតែងតាំងនៅក្នុងប្រទេសហៃទី ជាមួយនឹងបេសកកម្មនាំមកនូវសន្តិភាពដល់ប្រទេស និងដើម្បីអំពាវនាវសម្រាប់ការបោះឆ្នោតមុនឆ្នាំ ២០២៦ នៅពេលដែលអាណត្តិរបស់ក្រុមប្រឹក្សាផុតកំណត់។

នៅក្នុងសាលា លីសេ ហ្វីមេម(Lycee Fimem) ជាសាលារៀនមួយនៅជាយរដ្ឋធានី ប្រទេសហៃទី ក្រុមគ្រួសារជាច្រើនបានមកដល់ បន្ទាប់ពីបានភៀសខ្លួនចេញពីអំពើហិង្សារបស់ក្រុមជនអន្ធពាល និងបានបាត់បង់លំនៅឋានរបស់ពួកគេ។ នាង វេនីថា អាន់តញ(Venitha Antoine) បានមកដល់ជាមួយកូនចំនួនប្រាំនាក់ និងស្វាមីរបស់នាង នៅពេលដែលក្រុមជនអន្ធពាលបានដុតលំនៅឋានរបស់ពួកគេ។ លោក អង់សេ ហ្សង់ ប៉ាទ្រីក(Ence Jean Patrique) អាយុ៣១ឆ្នាំ បានមកដល់ទីជម្រកជាមួយគ្រួសាររបស់គាត់ បន្ទាប់ពីត្រូវបាននិរទេសពីសាធារណរដ្ឋដូមីនីក នៅពេលដែលអំពើហិង្សាបានផ្ទុះឡើង។

យោងតាមការប៉ាន់ប្រមាណរបស់អង្គការសហប្រជាជាតិ មនុស្សច្រើនជាងម្នាក់ ត្រូវបានសម្លាប់នៅក្នុងអំពើហឹង្សារបស់ក្រុមជនអន្ធពាលនៅប្រទេសហៃទីនៅក្នុងមួយម៉ោង ក្នុងរយៈពេលបីខែដំបូងនៃឆ្នាំនេះ។ ជាមួយគ្នានេះ ក៏មានរបាយការណ៍នៃក្រុមជនអន្ធពាលដែលប្រើអំពើហិង្សាផ្លូវភេទ ការចាប់ជំរិតទាមទារប្រាក់លោះ និងការធ្វើទារុណកម្មដើម្បីជំរិតទារប្រាក់ពីប្រជាជន។

ប្រទេសហៃទី បានជួបប្រទះការកើនឡើងអំពើហិង្សារបស់ក្រុមជនអន្ធពាលចាប់តាំងពីខែកុម្ភៈ។ ស្ថានភាពសន្តិសុខបានជម្លៀសមនុស្សរាប់ពាន់នាក់ និងបង្កឱ្យមានភាពអត់ឃ្លានដ៏មហន្តរាយ។

កាលពីសប្តាហ៍មុន បន្ទាប់ពីអតីតនាយករដ្ឋមន្ត្រី លោក Ariel Henry បានលាលែងពីតំណែង ក្រុមប្រឹក្សាប្រធានាធិបតីមួយ ត្រូវបានតែងតាំងជាផ្លូវការ ដែលត្រូវបានគេមើលឃើញថាជាជំហានដ៏សំខាន់ក្នុងការបង្កើតសន្តិសុខឡើងវិញ បន្ទាប់ពីអំពើហិង្សាក្រុមជនអន្ធពាលជាច្រើនឆ្នាំ ដែលបានកើនឡើងយ៉ាងខ្លាំងនាពេលថ្មីៗនេះ។