កងពលតូចដឹកជញ្ជូនលេខ៩៩ បានត្រៀមកម្លាំង រថយន្តធំតូច ស៊ីទែនទឹក និង​សម្ភារៈ​ជាច្រើនទៀត ដើម្បីចុះជួយអន្តរាគមន៍ដល់បងប្អូនប្រជាពលរដ្ឋគ្រប់រាជធានី-ខេត្ត​ទាំង​អស់​ដែល​ខ្វះ​ទឹក​ស្អាតប្រើប្រាស់។

បន្ទាប់ពីមានបទបញ្ជារបស់សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឲ្យ​កង​កម្លាំង​ប្រដាប់អាវុធ ត្រៀមកិច្ចអន្តរគមន៍​ជួយ​ប្រជាពលរដ្ឋ​ដោះ​ស្រាយ​បញ្ហា​កង្វះ​ទឹកស្អាត​របស់​ប្រជាពលរដ្ឋក្នុងពេលអាកាសធាតុក្តៅខ្លាំង នៅរដូវប្រាំងអូសបន្លាយពេលវេលានោះ លោក​ឧត្តម​សេនីយ៍ត្រី ហ៊ុល វណ្ឌី មេបញ្ជាការរង និងជានាយសេនាធិការ​កង​ពល​តូច​ដឹក​ជញ្ជូន​លេខ​៩៩ បានឲ្យដឹងថា កងពលតូច ដឹកជញ្ជូនលេខ៩៩ បានត្រៀមកម្លាំងជាង៦០នាក់ រថយន្ត​ចំនួន​៣​០​គ្រឿងបំពាក់ដោយស៊ីទែនទឹក និងម៉ាស៊ីនបូម​ទឹក​ទុក​សម្រាប់​ចេញ​ប្រតិបត្តិការ​ជួយដល់​បងប្អូន​ប្រជាពលរដ្ឋដែលខ្វះទឹកស្អាតប្រើប្រាស់ខណៈការត្រៀមនេះគឺ២៤ម៉ោងលើ២៤ម៉ោង។

 លោកឧត្តមសេនីយ៍ត្រី ហ៊ុល វណ្ឌី បានបញ្ជាក់ថា ដោយគោរពតាមបទបញ្ជាដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ឲ្យកងកម្លាំងប្រដាប់អាវុធ ត្រៀម​កិច្ចអន្តរគមន៍ជួយប្រជាពលរដ្ឋដោះស្រាយបញ្ហាកង្វះទឹកស្អាត របស់ប្រជាពលរដ្ឋ​ក្នុង​ពេល​អាកាស​ធាតុ​ក្តៅខ្លាំង​នៅរដូវប្រាំងអូសបន្លាយពេលវេលា និងគោរពតាមបទបញ្ជាយ៉ាង​ម៉ឺង​ម៉ាត់​របស់​នាយ​ឧត្តមសេនីយ៍ ម៉ឹង សំផន រដ្ឋលេខាធិការ ក្រសួងការពារជាតិ និងជាប្រធាន​ក្រុមកា​រងារ​សម្រប​សម្រួលការត្រៀមរៀបចំឆ្លើយតប សង្គ្រោះបន្ទាន់ និងស្តាឡើងវិញ និងឧត្តមសេនីយ៍ឯក ម៉ឹង ពន្លក អគ្គនាយក អគ្គនាយកដ្ឋាន ភស្តុភារ និងហិរញ្ញវត្ថុ ក្រសួងការពារជាតិ កងពល​តូច​ដឹក​ជញ្ជូន​លេខ​៩៩ ក្រោមការបញ្ជាផ្ទាល់របស់ ឧត្តមសេនីយ៍ទោ ហ៊ុល សំអុន មេបញ្ជាការ កងពល​តូច​ដឹក​ជញ្ជូនលេខ៩៩ បានត្រៀមរួចជាស្រេច រៀបចំសម្ភារៈ​ដែល​ចាំបាច់​មួយចំនួន​ដើម្បី​ជួយ​អន្តរគមន៍​ក្នុងហេតុការណ៍គ្រោះរាំងស្ងួង ដែលកើតឡើងជាយថាហេតុតាមបណ្តាខេត្តមួយចំនួន ខ​ណៈ​ដែលអាកាសធាតុក្តៅខ្លាំងនៅតែបន្តអូសបន្លាយនាពេលបច្ចុប្បន្ននេះ។

ក្នុងឱកាសអញ្ជើញជួបសំណេះសំណាលជាមួយមន្រ្តីរាជការ បុគ្គលិក កម្មករ និយោជិតកំពង់ផែ ស្វយ័ត​ក្រុងព្រះសីហនុ នាឱកាសអបអរសាទរខួបអនុស្សាវរីយ៍លើកទី១៣៨ នៃទិវា​ពលកម្ម​អន្តរជាតិ នាថ្ងៃទី១ ខែឧសភា ឆ្នាំ២០២៤នេះ សម្តេចធិបតី ហ៊ុន ម៉ាណែត បានចេញ​បទ​បញ្ជា​ឲ្យ​កង​កម្លាំង​ប្រដាប់ អាវុធទាំងអស់ត្រូវត្រៀមកម្លាំង និងសម្ភារផ្សេងៗ​សម្រាប់​ចុះ​ជួយ​អន្តរាគមន៍​ដល់​បងប្អូន​ប្រជាពលរដ្ឋទាំង អស់នៅទូទាំងប្រទេស ដោយមិនគិតអំពីនិន្នាការនោះឡើយ ខណៈ​ដែល​ពួក​គាត់ខ្វះទឹកប្រើប្រាស់ ស្អាតប្រើប្រាស់។ បទបញ្ជារបស់សម្តេចធិបតីនាយករដ្ឋមន្រ្តីនេះ គឺ​ស្រប​ពេល​ដែលកម្ពុជាមានអាកាសធាតុកំពុងហក់ឡើងខ្លាំង ដោយខេត្តខ្លះបាន​ឡើង​រហូត​លើស​៤០​អង្សាសេនោះ៕

អត្ថបទបាន ចក់