ទិវាពលកម្មអន្តរជាតិ១ឧសភា ក្រុមសហជីព ព្រមទាំងកម្មករ-កម្មការនី​រោងចក្រ​បាន​ប្តេជ្ញា​ចិត្ត​ថា​នឹង​រួម​គ្នាទៅមុខបន្តទៀត ធ្វើយ៉ាងណាដើម្បីអភិវឌ្ឍន៍វិស័យការងារឲ្យកាន់តែរីកចម្រើន ខណៈ​លក្ខ​ខណ្ឌ​ការងារនៅក្នុងរោងចក្រសហគ្រាសមានភាពល្អប្រសើរ និងមានការ​យក​ចិត្ត​ទុក​ដាក់​ខ្ពស់​ពី​សំណាក់​រាជរដ្ឋាភិបាល។

ឯកឧត្តម សួង ហួត ប្រធានសភាសម្ព័ន្ធសហជីពជាតិកម្ពុជា ក្នុងពិធី​ប្រារព្ធ​ខួប​អនុស្សាវរីយ៍​លើក​ទី​១៣៨ នៃទិវាពលកម្មអន្តរជាតិ ១ឧសភា ក្រោមប្រធានបទ “សហគ្រាសមួយ ជាសហគមន៍​សុខសាន្ត​មួយ” បានមានប្រសាសន៍ឲ្យដឹងថា មកដល់ពេលនេះ បាន​ពង្រីក​សមាជិក​ក្រុម​ប្រឹក្សា​ភិបាល​ចំនួន៤៧ ដែលមានសមាជិកភាពនៅតាមបណ្តារាជធានី ខេត្តសរុបចំនួនជិត ៣០ម៉ឺន​នាក់ ក្នុងគោលបំណងកសាង ឬចងក្រងសមាជិកសាខានៅតាមរោងចក្រ សហគ្រាស ក្រុមហ៊ុន សិប្បកម្ម ក្នុងវិស័យមានដូចជា៖ ទេសចរណ៍ អប់រំ សេដ្ឋកិច្ចក្រៅប្រព័ន្ធ កសិកម្ម និងទេសន្ត​ប្រវេសន៍​។ល។ ទប់ស្កាត់កូដកម្ម និងបាតុកម្មទាំងឡាយណាដែលមានចរិកផ្ទុយ និង​គោលការណ៍​ច្បាប់ជាតិ​ និងបទដ្ឋានការការងារអន្តរជាតិជាដើម។

ជាមួយការរៀបចំទិវាពលកម្មអន្តរជាតិ១ឧសភា ក្រោមប្រធានបទ “សហគ្រាសមួយ ជា​សហគម​ន៍​សុខសាន្តមួយ ឯកឧត្តមប្រធាន បានជំរុញឲ្យសមាជិក សមាជិកាទាំងអស់ ជាពិសេស​សហជីព​មូល​ដ្ឋាន ត្រូវរួមសហការគ្នាឲ្យបានល្អក្នុងការសម្រេចឲ្យបានជោគជ័យ ដើម្បីធ្វើឱ្យមាន​វឌ្ឍនភាព សម្រាប់​កម្មករ​និយោជិត និយោជកឱ្យកាន់តែប្រសើរ និងការទាក់ទាញ​អ្នក​វិនិយោគ​ឱ្យ​កាន់​តែ​ច្រើន​មក​បណ្តាក់ទុននៅកម្ពុជា។

កម្មករ កម្មការិនី មកពីរោងចក្រផ្សេងគ្នា បានទទួលស្គាល់ថា រហូតមកដល់សព្វថ្ងៃនេះ រាជ​រដ្ឋាភិបាល​កម្ពុជា បានផ្តល់នូវការយកចិត្តទុកដាក់ខ្ពស់ជានិច្ចមកកាន់កម្មកររោងចក្រ ដូចជាការ​ដំឡើង​ប្រាក់​ឈ្នួល និងការផ្តល់ការថែទាំសុខភាពជាដើម។ ពួកគាត់ បានលើកឡើង​ស្រដៀង​គ្នា​ទៀត​ថា​ រាជរដ្ឋាភិបាលតាំងពីអាណត្តិមុនៗ រហូតដល់អាណត្តិទី៧ តែងតែគិតគូរ​ផល​ប្រយោជន៍​ជូន​កម្មករ ដែលបាននិងកំពុងធ្វើឱ្យកម្មករនៅទូទាំងប្រទេសទទួលបានជីវភាពធូរធារ និងកាន់​តែ​ប្រសើរ​ឡើង​ជាលំដាប់។

សូមបញ្ជាក់ថា ក្នុងឱកាសប្រារព្ធខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ឧសភា​នេះ ក្រសួងការងារ និងបណ្តុះបណ្តាលវិជ្ជាជីវៈ បានរៀបចំយុទ្ធនាការប្រឡងប្រណាំង “សហគ្រាស​មួយ ជាសហគមន៍សុខសាន្តមួយ” នៅទូទាំងប្រទេសចាប់ពីឆ្នាំ២០២៤នេះតទៅ ដើម្បី​ចូលរួមលើកកម្ពស់សុខដុមនីយកម្មក្នុងទំនាក់ទំនងវិជ្ជាជីវៈនៅតាមរោងចក្រ សហគ្រាស។ ការ​ប្រឡង​ប្រណាំង ដើម្បីទទួលបានពានរង្វាន់នេះ ត្រូវអនុវត្តជារៀងរាល់ឆ្នាំ ចំពោះ​សហគ្រាស​ផ្នែក​វាយ​នភណ្ឌកាត់ដេរ ផលិតស្បែកជើង និងផលិតផលធ្វើដំណើរ និងកាបូប និង​សហគ្រាស​ផ្នែក​ផ្សេង​ទៀត ដែលស្ម័គ្រចិត្តចូលរួមប៉ុណ្ណោះ៕ អត្ថបទ​៖ ឈិត បូរ៉ាវី