បណ្តាសាលារៀនរដ្ឋ នៅខេត្តកណ្តាល នៅថ្ងៃទី២ ខែឧសភានេះ បាន​ចាប់ផ្តើម​ការ​អនុវត្ត​ការ​ណែ​នាំក្រសួងអប់រំយុវជន និងកីឡា ផ្លាស់ប្តូរម៉ោងរៀន និងបង្រៀន ដើម្បីបង្ការទប់ស្កាត់ហានិភ័យ និង​ចៀសវាងជំងឺផ្សេងៗ ដែលបង្កប៉ះពាលដល់សុខភាពសិស្សានុសិស្ស អំឡុងក្នុងរដូវប្រាំងនេះ អាកាស​ធាតុកំពុងឡើងកម្ដៅខ្លាំង។

គណៈគ្រប់គ្រងសាលាបឋមសិក្សាហ៊ុន សែន កំពង់សំណាញ់ និងវិទ្យាល័យហ៊ុន សែន សេរីភាព ក្រុង​តាខ្មៅ ខេត្តកណ្តាល បានថ្លែងប្រាប់ BTV នៅថ្ងៃទី២ ខែឧសភា ថ្លែងថា នៅថ្ងៃនេះ គណៈ​គ្រប់​សាលា បានប្រកាសដល់គ្រប់សិស្សានុសិស្សរួចហើយថា ដោយបញ្ហាអាកាសធាតុក្តៅខ្លាំង សាលា​សម្រេច​ផ្លាស់ប្តូរម៉ោងរៀន និងបង្រៀននៅពេលព្រឹកចាប់ចូលរៀននៅម៉ោង៧ និងចេញ​ពី​រៀន​វិញ​នៅ​ម៉ោង១០ព្រឹក ហើយថ្ងៃរសៀលចាប់ចូលរៀននៅម៉ោង២ និងចេញវិញនៅម៉ោង ៥​លា្ងច ហើយទន្ទឹមនឹងនេះដែរសាលាក៏បានរៀបចំប្រព័ន្ធទឹកស្រោចស្រពទឹកបរិវេណសាលា និង​រៀប​ចំ​ដាក់​កង្ហាក្នុងថ្នាក់រៀន ដើម្បីបញ្ចុះសីតុណ្ហភាពក្ដៅខ្លាំងនៅបរិវេណសាលារៀន។

ក្រុមសិស្សថ្លែងថាក្នុងអំឡុងអាកាសធាតុកំពុងឡើងកម្ដៅនេះកន្លងមកជារឿយៗ គណៈ​គ្រប់គ្រង​សាលា និងលោកគ្រូអ្នកគ្រូ តែងតែក្រើនរំលឹកឲ្យសិស្សពិសារទឹកស្អាតឲ្យបានច្រើន ចៀស​វាង​ភេសជ្ជៈ​ផ្អែ​មខ្លាំង ប្រៃខ្លាំង ដែលងាយធ្វើឲ្យរាង្គកាយខ្សោះជាតិទឹក ងាយបង្កជំងឺវិលមុខ ឈឺ​ក្បាល​ ក្អួតចង្កោរ ដួលសម្លាប់ជាដើម ហើយមកដល់ពេលនេះ សាលាបានសម្រេចផ្លាស់ប្តូរសិក្សា ខណៈ​ការរៀនចាប់ពីម៉ោង១០ ឡើងទៅ ធ្វើឲ្យសិស្សទាំងអស់គ្នា បែកញើស ក្តៅ និងហាក់រៀន​មាន​អារម្មណ៍មិនល្អជាដើមនៅក្នុងថ្នាក់ជាដើម។

លោក ចេង សំអ៊ុល ប្រធានមន្ទីរអប់រំយុវជន និងកីឡាខេត្តកណ្តាល មកដល់ពេលនេះផ្សព្វផ្សាយ សេចក្តី​ណែនាំការអនុវត្តម៉ោងបង្រៀន និងរៀនជូន​បណ្តា​គណៈ​គ្រប់គ្រង​សាលា​ទាំងអស់​រួច​ហើយ​នៅ​ខេត្តកណ្តាល ហើយបណ្តាសាលារៀន មានសិទ្ធក្នុងការសម្រេចជាក់ស្តែង ក្នុងក​រណី​សីតុណ្ហ​ភាព​ឡើងកំដៅខ្លាំង ។

ទន្ទឹមនឹង​នេះលោកក៏បានណែនាំឲ្យគ្រប់គណៈគ្រប់សាលាត្រូវរាយការណ៍បន្ទាន់មកមន្ទីរអបរំខេត្ត និង​អាជ្ញាធរ​មូលដ្ឋានខ្លួន ក្នុងករណីសិស្ស លោកគ្រូអ្នកគ្រូ ឬសាលារៀន ជួបរងបញ្ហាផ្សេងៗ ដោយ​សារ​ការ​ឡើងកំដៅអាកាសធាតុ ដែលមិនអាចដោះស្រាយបាន៕ អត្ថបទ ស៊ុម សុខជា