កំពង់ឆ្នាំង៖ ប្រជាពលរដ្ឋក្នុងខេត្តកំពង់ឆ្នាំង បានសំដែងនូវការដឹងគុណ និងសប្បាយចិត្តជាខ្លាំងចំពោះសម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្ត្រី ដោយនៅក្នុងឆ្នាំ២០២៣នេះ ពួកគាត់ទទួលបានផ្លូវកៅស៊ូ ផ្លូវបេតុង ផ្លូវក្រាលគ្រួសក្រហម ផ្លូវក្រាលដីស ចំនួន៦៧២ខ្សែ ស្មើនឹងជិត២ពាន់គីឡូម៉ែត្រធ្វើអោយពួកគាត់លែងព្រួយបារម្ភពីបញ្ហាសុខភាពដោយសារធូលីហុយទៀត ព្រោះផ្លូវទាំងនោះបានក្លាយជាផ្លូវកៅស៊ូ ផ្លូវក្រាលគ្រួសក្រហម ផ្លូវបេតុង ផ្លូវដីស មានប្រព័ន្ធអគ្គីសនី និងមានទឹកស្អាតប្រើប្រាស់មិនចាញ់ទីក្រុងឡើយ។
ប្រជាពលរដ្ឋខេត្តកំពង់ឆ្នាំងបញ្ជាក់ថា៖ កាលពីមុនផ្លូវទាំងនេះ ជាផ្លូវរទេះកាត់ស្រែ កាត់ព្រៃ ក្រោយមកទៀតរាជរដ្ឋាភិបាលបានប្រែក្លាយផ្លូវជនបទទាំងនោះទៅជាផ្លូវក្រាលគ្រួសក្រហម ផ្លូវក្រាលដីស ផ្លូវបេតុង និងផ្លូវកៅស៊ូ ។ ផ្លូវដែលធ្លាប់ពិបាកធ្វើដំណើរពីមុន ពេលនេះប្រជាពលរដ្ឋបានធ្វើដំណើរទៅមកងាយស្រួលជាងមុន ចំណេញពេលវេលា និងសន្សំសំចៃប្រាក់កាសទៀតផង។ ប្រមុខរាជរដ្ឋាភិបាលកម្ពុជា តាមរយៈក្រសួងអភិវឌ្ឍន៍ជនបទ បានប្រែក្លាយផ្លូវទាំងអស់នោះទៅជាផ្លូវកៅស៊ូDBST, ផ្លូវបេតុង, ផ្លូវក្រាលគ្រួសក្រហម, ផ្លូវដីស បានជាច្រើនខ្សែក្នុងខេត្ត និងបានកសាងស្ពានថ្មី ដាក់លូប្រអប់ និងលូមូល នាំប្រជាពលរដ្ឋតាមេជនបទក្នុងខេត្តទាំងអស់អាចធ្វើដំណើរទៅមកបានងាយស្រួលទាំងទៅមណ្ឌលសុខភាព ទៅវត្តអារាម ទៅមកសាលារៀន ងាយស្រួលក្នុងការដឹកកសិផល និងមន្ត្រីរាជការទៅមកធ្វើការជាដើម។
ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា៖ គម្រោងកែលម្អផ្លូវជនបទក្នុងខេត្តកំពង់ឆ្នាំងនាឆ្នាំ២០២៣នេះ ត្រូវបានរាជរដ្ឋាភិបាលកម្ពុជា តាមរយៈក្រសួង និងមន្ទីរអភិវឌ្ឍន៍ជនបទ កសាងបានចំនួន៦៧២ខ្សែ ស្មើនឹង១៩៥១,៩៦គីឡូម៉ែត្រ ក្នុងនោះមានផ្លូវកៅស៊ូDBSTចំនួន៨៣ខ្សែ មានប្រវែងជាង៥៥៣គីឡូម៉ែត្រ, ផ្លូវក្រាលគ្រួសក្រហមចំនួន៥៥៦ខ្សែ ស្មើនឹងជាង១២៨៧គីឡូម៉ែត្រ, ផ្លូវក្រាលថ្មភ្នំចំនួន១០ខ្សែ ស្មើនឹងជាង២៧គីឡូម៉ែត្រ, ផ្លូវដីសចំនួន១៩ខ្សែ ស្មើនឹងប្រវែង៥៦គីឡូម៉ែត្រ។
មន្ទីរអភិវឌ្ឍន៍ជនបទបានអនុវត្តថែទាំជាប្រចាំផ្លូវក្រាលគ្រួសក្រហមចំនួន១៥ខ្សែ ប្រវែងជាង១០៨គីឡូម៉ែត្រ, ស្ថិតស្រុកសាមគ្គីមានជ័យ, ស្រុករលាប្អៀរ, ស្រុកទឹកផុស, ស្រុកកំពង់ត្រឡាច អនុវត្តបាន១០០%។ ថែទាំផ្លូវDBSTចំនួន៧ខ្សែ ប្រវែងជាង៥២គីឡូម៉ែត្រ ស្ថិតក្នុងស្រុកសាមគ្គីមានជ័យ និងស្រុករលាប្អៀរ អនុវត្តបាន១០០%។ បានថែទាំខួបផ្លូវក្រាលគ្រួសក្រហមចំនួន៣ខ្សែ ប្រវែងជាង២៥គីឡូម៉ែត្រ ស្ថិតក្នុងឃុំត្រងិល ឃុំស្វាយរំពារ ស្រុកកំពង់លែង, ឃុំថ្មឥដ្ឋ ឃុំឈូកស ស្រុកកំពង់ត្រឡាច, ឃុំអភិវឌ្ឍន៍ ស្រុកទឹកផុស អនុវត្តបាន១០០%។
ក្នុងគម្រោងកែលម្អផ្លូវជនបទឆ្នាំ២០២៣នេះ រដ្ឋបាលខេត្តកំពង់ឆ្នាំង បានដាក់ប្រព័ន្ធអគ្គិសនី និងប្រេព័ន្ធទឹកស្អាតនៅតាមបណ្តោយផ្លូវមួយចំនួនរួចជាស្រេច ដែលរឹតតែផ្តល់ភាពងាយស្រួលដល់ជិវភាពប្រចាំថ្ងៃរបស់ប្រជាពលរដ្ឋ ជួយដល់សុខភាព សន្សំសំចៃថវិកាក្នុងគ្រួសារ ចំណេញពេលវេលា និងងាយស្រួលក្នុងការប្រាស្រ័យទាក់ទងគ្នាផងដែរ ៕ ដោយ ៖ កាំង ហុងវាស្នា