ហ្វីលីពីន នៅថ្ងៃព្រហស្បតិ៍ (០២ ឧសភា) នេះបានកោះហៅអ្នកការទូតចិន ម្នាក់ដើម្បីតវ៉ាចំពោះការប្រើប្រាស់កាណុងបាញ់ទឹករបស់ទីក្រុងប៉េកាំង ប្រឆាំងនឹងនាវាហ្វីលីពីន នៅឯដែនទឹកដែលមានជម្លោះក្នុងសមុទ្រចិនខាងត្បូង ដោយពណ៌នាថានោះជាការយាយី និងជា «សកម្មភាពដ៏គ្រោះថ្នាក់»។

ក្រសួងការបរទេសហ្វីលីពីន បាននិយាយថា អនុប្រធានបេសកកម្មរូបនោះត្រូវបានកោះហៅឱ្យស្តាប់ការតវ៉ាលើកទី២០ ដែលធ្វើឡើងដោយហ្វីលីពីន ប្រឆាំងនឹងប្រទេសចិន នៅក្នុងឆ្នាំនេះ ដែលជាមួយក្នុងចំណោមការតវ៉ា ១៥៣ ដងក្រោមរដ្ឋបាលបច្ចុប្បន្ន ជុំវិញការប្រព្រឹត្តដាក់ឆ្មាំល្បាតឆ្នេរ និងនាវានេសាទរបស់ក្រុងម៉ានីល។

សេចក្តីថ្លែងការណ៍ក្រសួងនិយាយថា «ហ្វីលីពីន បានតវ៉ាចំពោះការយាយី ការវាយឆ្មក់ ឃ្លាំមើល និងការរារាំង រួមទាំងសកម្មភាពពត់ពេនដ៏គ្រោះថ្នាក់ និងការប្រើប្រាស់កាណុងបាញ់ទឹករបស់នាវាឆ្មាំល្បាតឆ្នេរចិន ហើយជំរុញឱ្យអ្នកទាំងនោះចាកចេញពីដែនទឹកភ្លាមៗ»។

ហ្វីលីពីន បានចោទប្រកាន់ចិន ពីការបង្កើនភាពតានតឹងនៅសមុទ្រចិនខាងត្បូង បន្ទាប់ពីឆ្មាំល្បាតឆ្នេររបស់ខ្លួនបានប្រើប្រាស់កាណុងបាញ់ទឹក និងបង្កការខូចខាតដល់នាវាពីររបស់ហ្វីលីពីន ខណៈកំពុងធ្វើដំណើរទៅកាន់ដែនទឹកជម្លោះ ស្កាបូរ៉ូ ស្ហូល (Scarborough Shoal) កាលពីថ្ងៃអង្គារ ដើម្បីជួយអ្នកនេសាទ៕