ប្រធានាធិបតីកូឡុំប៊ី លោក ហ្គាស្តូវ៉ូ ផេត្រូ (Gustavo Petro) បាននិយាយកាលពីថ្ងៃពុធ (០១ ឧសភា) ថាលោកនឹងផ្តាច់ទំនាក់ទំនងការទូតជាមួយអ៊ីស្រាអែល ជុំវិញសកម្មភាពរបស់ខ្លួននៅក្នុងតំបន់ហ្កាហ្សា។

លោក ផេត្រូ បានរិះគន់នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) យ៉ាងចាស់ដៃរួចមកហើយ និងបានស្នើសុំចូលរួមក្នុងសំណុំរឿងរបស់អាហ្វ្រិកខាងត្បូងដែលចោទប្រកាន់អ៊ីស្រាអែល ពីបទប្រល័យពូជសាសន៍នៅតុលាការយុត្តិធម៌អន្តរជាតិ (ICJ)។

លោក ផេត្រូ បានប្រាប់ការប្រមូលផ្ដុំទីក្រុងបូហ្គោតា ដែលបានដង្ហែក្បួនប្រារព្ធទិវាពលកម្មអន្តរជាតិថា «យើងសូមប្រកាសថា យើងនឹងផ្តាច់ទំនាក់ទំនងការទូតជាមួយរដ្ឋអ៊ីស្រាអែល ដោយសារតែការមានរដ្ឋាភិបាល និងថ្នាក់ដឹកនាំដែលគាំទ្រដល់អំពើប្រល័យពូជសាសន៍»។

រដ្ឋមន្ត្រីការបរទេសអ៊ីស្រាអែល លោក អ៊ីស្រាអែល ខាត់ស៍ (Israel Katz) បានចោទលោក ផេត្រូ ថាជា «អ្នកប្រឆាំង និងពោរពេញដោយការស្អប់ខ្ពើមលើជនជាតិជ្វីហ្វ»។ លោកនិយាយថា ចំណាត់ការរបស់លោក ផេត្រូ គឺជារង្វាន់ដល់ក្រុមប្រដាប់អាវុធហាម៉ាស ដែលកាលពីថ្ងៃទី០៧ ខែតុលា បានដឹកនាំការវាយប្រហារដ៏បង្ហូរឈាមទៅលើមូលដ្ឋានយោធា និងសហគមន៍អ៊ីស្រាអែល។

ប្រទេសបូលីវី បានផ្ដាច់ទំនាក់ទំនងជាមួយអ៊ីស្រាអែល កាលពីចុងខែតុលា ឆ្នាំមុន ខណៈដែលប្រទេសមួយចំនួនទៀតនៅអាមេរិកឡាទីន រួមទាំងកូឡុំប៊ី ឈីលី និងហុងឌុយរ៉ាស បានកោះហៅឯកអគ្គរដ្ឋទូតរបស់ពួកគេត្រឡប់មកវិញ៕