ប្រធានាធិបតីអាមេរិក លោក Joe Biden បាននិយាយថា «ការរើសអើងជនបរទេស» ឬ «ជាតិនិយមជ្រុលពេក» នៅក្នុងប្រទេសចិន ជប៉ុន និងឥណ្ឌា កំពុងរំខានដល់កំណើនសេដ្ឋកិច្ចរបស់ពួកគេ ខណៈដែលលោកបានអះអាងថា វត្តមានជនអន្តោប្រវេសន៍ គឺល្អសម្រាប់សេដ្ឋកិច្ចរបស់សហរដ្ឋអាមេរិក។

ក្នុងព្រឹត្តិការណ៍រៃអង្គាសថវិកា នៅទីក្រុងវ៉ាស៊ីនតោន សម្រាប់យុទ្ធនាការរបស់លោក ក្នុងការស្វែងរកការជាប់ឆ្នោតឡើងវិញឆ្នាំ២០២៤ លោក Biden បានប្រាប់ថា៖ «ហេតុផលមួយក្នុងចំណោមហេតុផលដែលធ្វើឲ្យសេដ្ឋកិច្ចរបស់យើងរីកចម្រើន គឺដោយសារតែអ្នកទាំងអស់គ្នា និងមនុស្សជាច្រើនទៀត។ ហេតុអ្វី? ដោយសារតែយើងស្វាគមន៍ជនអន្តោប្រវេសន៍»។

លោកបានបន្ថែមថា៖ «ហេតុអ្វីបានជាចិនជាប់គាំងផ្នែកសេដ្ឋកិច្ចយ៉ាងធ្ងន់ធ្ងរ ហេតុអ្វីបានជាជប៉ុនមានបញ្ហា ហេតុអ្វីបានជារុស្ស៊ី ហើយហេតុអ្វីបានជាឥណ្ឌា ព្រោះពួកគេ គឺជាអ្នករើសអើងជនបរទេស។ ពួកគេមិនចង់បានជនអន្តោប្រវេសន៍នោះទេ។ ជនអន្តោប្រវេសន៍ គឺជាអ្វីដែលធ្វើឲ្យប្រទេសយើងរឹងមាំ»។

គួរបញ្ជាក់ថា មូលនិធិរូបិយវត្ថុអន្តរជាតិ (IMF) បានព្យាករក្នុងខែមេសាថា កំណើនសេដ្ឋកិច្ចរបស់ប្រទេសនីមួយៗ នឹងធ្លាក់ចុះនៅឆ្នាំ២០២៤ បើប្រៀបនឹងឆ្នាំមុន ដោយមានកំណើនចាប់ពី ០,៩ភាគរយនៅក្នុងប្រទេសកំពុងអភិវឌ្ឍខ្លាំង គឺជប៉ុន រហូតដល់ ៦,៨ភាគរយ ក្នុងប្រទេសកំពុងរីកចម្រើន គឺឥណ្ឌា។

ការព្យាករណ៍នេះ បានបង្ហាញទៀតថា សហរដ្ឋអាមេរិកនឹងមានកំណើនសេដ្ឋកិច្ច ២,៧ភាគរយ ដែលលឿនជាងអត្រា ២,៥ភាគរយរបស់ប្រទេសនេះ ក្នុងឆ្នាំ២០២៣។ ហើយអ្នកសេដ្ឋកិច្ចជាច្រើនចាត់ទុកថា លទ្ធផលល្អប្រសើរជាងការរំពឹងទុកនេះ គឺមួយផ្នែកដោយសារជនអន្តោប្រវេសន៍ដែលពង្រីកកម្លាំងពលកម្មរបស់ប្រទេស។

តែយ៉ាងណាក្ដី ការព្រួយបារម្ភអំពីចំនួនជនអន្តោប្រវេសន៍ច្រើនខុសប្រក្រតី បានក្លាយជាបញ្ហាធំចម្បង សម្រាប់អ្នកបោះឆ្នោតអាមេរិកជាច្រើន នៅមុនការបោះឆ្នោតប្រធានាធិបតីខែវិច្ឆិកា៕