ដោយមានចម្ងាយរាប់ពាន់គីឡូម៉ែត្រពីកន្លែងតវ៉ា នៅបរិវេណសាលា ដែលបានបែងចែកជនជាតិអាមេរិក ជនជាតិប៉ាឡេស្ទីនផ្លាស់ទីលំនៅមួយចំនួន កំពុងបង្ហាញពីសាមគ្គីភាពជាមួយបាតុករប្រឆាំងសង្រ្គាម និងសម្ដែងការដឹងគុណ ចំពោះការខិតខំប្រឹងប្រែងរបស់ពួកគេ។

សារគាំទ្រជាច្រើន ត្រូវបានសរសេរនៅលើតង់មួយចំនួន នៅភាគខាងត្បូងទីក្រុង Rafah ជាកន្លែងដែលមនុស្សផ្លាស់ទីលំនៅប្រហែល ១លាននាក់ បានស្វែងរកទីជម្រក ដើម្បីគេចពីការទម្លាក់គ្រាប់បែករបស់អ៊ីស្រាអែល និងការប្រយុទ្ធគ្នាផ្លូវគោកដែលមន្ត្រីសុខាភិបាលហ្គាហ្សាបាននិយាយថា បានសម្លាប់មនុស្សជាង ៣៤.០០០នាក់។

សារមួយ ដែលសារព័ត៌មាន Reuters បានកាត់ចេញពីវីដេអូ បានសរសេរថា៖ «សូមអរគុណ សាកលវិទ្យាល័យអាមេរិក»។ ចំណែកសារមួយទៀត បានរៀបរាប់ថា៖ «សូមអរគុណដល់និស្សិតទាំងអស់ដែលមានសាមគ្គីភាពជាមួយហ្កាហ្សា។ សាររបស់អ្នកទាំងអស់គ្នាបានមកដល់ពួកយើងហើយ»។

គួរបញ្ជាក់ថា ភាពតានតឹងបានកើនឡើងកាន់តែខ្លាំងនៅក្នុងបរិវេណសាលា នៅទូទាំងសហរដ្ឋអាមេរិក ដោយនគរបាលក្នុងឧបករណ៍បង្ក្រាបកុបកម្ម បានចាប់ខ្លួនមនុស្សរាប់សិបនាក់ នៅសាកលវិទ្យាល័យ Columbia ក្នុងទីក្រុងញូវយ៉ក សហរដ្ឋអាមេរិក កាលពីយប់ថ្ងៃទី៣០ ខែមេសា ហើយមន្រ្តីនៅទូទាំងប្រទេស បានប៉ះទង្គិចជាមួយបាតុករគាំទ្រប៉ាឡេស្ទីន ដែលបានធ្វើជំរំ និងរឹបអូសអគារសិក្សានៅតាមស្ថាប័នផ្សេងៗ។

ក្រុមបាតុករ បាន និងកំពុងអំពាវនាវឲ្យសាកលវិទ្យាល័យដកខ្លួនចេញពីក្រុមហ៊ុនដែលមានទំនាក់ទំនងជាមួយអ៊ីស្រាអែល ហើយខ្លះបានប្តេជ្ញាថា នឹងមិនថយក្រោយជាដាច់ខាត៕