មន្ត្រីជាន់ខ្ពស់អាមេរិកម្នាក់ នៅថ្ងៃព្រហស្បតិ៍ (ទី២ ខែឧសភា) បានជំរុញឲ្យប្រទេសចិន និងរុស្ស៊ី ត្រូវតែស្របនឹងការប្រកាសរបស់សហរដ្ឋអាមេរិក និងប្រទេសដទៃទៀត ដែលថា មានតែមនុស្សប៉ុណ្ណោះ ពោលគឺមិនមែនបញ្ញាសិប្បនិម្មិត (AI) នោះឡើយ ធ្វើការសម្រេចចិត្ត ជុំវិញការដាក់ពង្រាយអាវុធនុយក្លេអ៊ែរ។

មន្ត្រីគ្រប់គ្រងអាវុធរបស់ក្រសួងការបរទេសអាមេរិក លោក Paul Dean បានប្រាប់សន្និសីទសារព័ត៌មានតាមអនឡាញថា ទីក្រុងវ៉ាស៊ីនតោនបានធ្វើការប្តេជ្ញាចិត្តយ៉ាងច្បាស់លាស់ និងរឹងមាំថា មនុស្សបានគ្រប់គ្រងទាំងស្រុងលើអាវុធនុយក្លេអ៊ែរ ដោយបន្ថែមថា បារាំង និងអង់គ្លេស ក៏បានប្រកាសដូចគ្នាដែរ។

លោក Dean អនុរដ្ឋមន្ត្រីនៃការិយាល័យគ្រប់គ្រងអាវុធ ទប់ស្កាត់ និងស្ថិរភាព បាននិយាយថា៖ «យើងនឹងស្វាគមន៍ចំពោះសេចក្តីថ្លែងការណ៍ស្រដៀងគ្នារបស់ប្រទេសចិន និងសហព័ន្ធរុស្ស៊ី»។

ដោយសំដៅទៅលើសមាជិកអចិន្ត្រៃយ៍ទាំង៥ នៃក្រុមប្រឹក្សាសន្តិសុខអង្គការសហប្រជាជាតិ លោកបានបន្ថែមថា៖ «យើងគិតថា វាជាបទដ្ឋានដ៏សំខាន់បំផុតនៃឥរិយាបថប្រកបដោយការទទួលខុសត្រូវ ហើយយើងគិតថា វាជាអ្វីដែលនឹងត្រូវបានស្វាគមន៍យ៉ាងខ្លាំងក្លា»។

ការលើកឡើងបែបនេះរបស់លោក Dean ធ្វើឡើងនៅពេលដែលរដ្ឋបាលរបស់ប្រធានាធិបតីអាមេរិក លោក Joe Biden ព្យាយាមពិភាក្សាយ៉ាងស៊ីជម្រៅដាច់ដោយឡែកពីគ្នា ជាមួយប្រទេសចិន ជុំវិញគោលនយោបាយអាវុធនុយក្លេអ៊ែរ និងការរីកចម្រើន AI។

ពាក់ព័ន្ធនឹងការលើកឡើងនេះ ក្រសួងការពារជាតិចិន មិនបានឆ្លើយតបភ្លាមៗនោះឡើយ ចំពោះសំណើសុំការអត្ថាធិប្បាយ។ ប្រទេសចិន ដែលកំពុងពង្រីកសមត្ថភាពអាវុធនុយក្លេអ៊ែររបស់ខ្លួន បានជំរុញកាលពីខែកុម្ភៈថា មហាអំណាចនុយក្លេអ៊ែរដ៏ធំបំផុត គួរតែចរចារលើសន្ធិសញ្ញាមិនប្រើប្រាស់ដំបូង រវាងគ្នាទៅវិញទៅមក៕