សហរដ្ឋអាមេរិក កំពុងដាក់ទណ្ឌកម្មជិត ៣០០គោលដៅ នៅក្នុងប្រទេសរុស្ស៊ី ខណៈដែលខ្លួន បានចោទប្រកាន់វិមានក្រឹមឡាំងថា បានប្រើប្រាស់សារធាតុគីមី «ជាវិធីសាស្រ្តនៃសង្គ្រាម»ប្រឆាំងនឹងកងទ័ពអ៊ុយក្រែន។

រដ្ឋបាលលោក បៃដិន ( Biden) បានលាតត្រដាងទណ្ឌកម្មកាលពីថ្ងៃពុធ ខណៈដែលខ្លួនព្យាយាមធ្វើឲ្យ ខូចទ្រង់ទ្រាយឧស្សាហកម្មយោធារបស់វិមានក្រឹមឡាំង ដោយសារសង្គ្រាមរបស់ខ្លួន នៅអ៊ុយក្រែន។

ក្រសួងការបរទេស បាននិយាយនៅក្នុងសេចក្តីថ្លែងការណ៍មួយថា៖«សហរដ្ឋអាមេរិក នឹងបន្តប្រើប្រាស់ឧបករណ៍នៅក្នុងការដាក់ទណ្ឌកម្មរបស់ខ្លួន ដើម្បីបង្អាក់ការគាំទ្រសម្រាប់មូលដ្ឋានយោធា-ឧស្សាហកម្មរបស់រុស្ស៊ី និងកាត់បន្ថយការប្រើប្រាស់ប្រព័ន្ធហិរញ្ញវត្ថុអន្តរជាតិរបស់រុស្ស៊ី ដើម្បីធ្វើសង្គ្រាមប្រឆាំងនឹងអ៊ុយក្រែនបន្ថែមទៀត»។

«យើងបន្តឈរក្នុងសាមគ្គីភាពជាមួយប្រជាជនរុស្ស៊ីដែលខិតខំ ដើម្បីអនាគតប្រជាធិបតេយ្យបន្ថែមទៀត និងជាមួយអ៊ុយក្រែ នការពារមាតុភូមិរបស់ពួកគេពីការឈ្លានពានរបស់រុស្ស៊ី»។

ការវិភាគស្ថិតិនៃវិធានការដាក់ទណ្ឌកម្ម មើលឃើញថា ក្រសួងរតនាគារ បានវាយលុកគោលដៅជិត ២០០រួមទាំងអង្គភាពជាង ១០០ដែលប្រតិបត្តិការនៅក្នុងមូលដ្ឋានយោធា-ឧស្សាហកម្មរបស់រុស្ស៊ី ខណៈដែលក្រសួងការបរទេស បានចុះក្នុងបញ្ជីខ្មៅនូវអង្គភាព៨០ និងបុគ្គលមួយចំនួន ដែលចូលរួមក្នុងការគេចវេសពីទណ្ឌកម្ម និងពាក់ព័ន្ធនឹងការប្រើប្រាស់សារធាតុគីមីនិងអាវុធជីវសាស្រ្តរបស់ទីក្រុងមូស្គូ។