ក្រុមហ៊ុន Microsoft នៅថ្ងៃព្រហស្បតិ៍ (ទី២ ខែឧសភា) នេះ បានប្រាប់ឲ្យដឹងថា ខ្លួននឹងវិនិយោគនូវទឹកប្រាក់ ២,២ពាន់លានដុល្លារ សម្រាប់រយៈពេល ៤ឆ្នាំខាងមុខ នៅក្នុងប្រទេសម៉ាឡេស៊ី ដើម្បីពង្រីកសេវាផ្ទុកទិន្នន័យ និងបញ្ញាសិប្បនិម្មិត (AI) ដែលជាការជំរុញចុងក្រោយបង្អស់របស់ក្រុមហ៊ុន ក្នុងការលើកកម្ពស់បច្ចេកវិទ្យា AI ជំនាន់ថ្មីរបស់ខ្លួន នៅតំបន់អាស៊ី។

ការវិនិយោគដែលប្រកាសដោយនាយកប្រតិបត្តិ លោក Satya Nadella អំឡុងពេលធ្វើសុន្ទរកថា នៅទីក្រុងគួឡាឡាំពួ គឺជាការវិនិយោគដ៏ធំបំផុតក្នុងប្រវត្តិសាស្រ្តរយៈពេល ៣២ឆ្នាំរបស់ក្រុមហ៊ុន Microsoft នៅម៉ាឡេស៊ី។ ក្រុមហ៊ុនបានប្រាប់ថា វានឹងរួមបញ្ចូលការកសាងហេដ្ឋារចនាសម្ព័ន្ធផ្ទុកទិន្នន័យ និង AI ការបង្កើតឱកាសទទួលបានជំនាញ AI សម្រាប់មនុស្ស ២០០.០០០នាក់ និងគាំទ្រអ្នកអភិវឌ្ឍន៍របស់ប្រទេស។

នៅក្នុងសេចក្តីថ្លែងការណ៍របស់ខ្លួន ក្រុមហ៊ុន Microsoft បានឲ្យដឹងថា ខ្លួនក៏នឹងធ្វើការជាមួយរដ្ឋាភិបាលម៉ាឡេស៊ី ដើម្បីបង្កើតមជ្ឈមណ្ឌលឧត្តមភាព AI ជាតិ និងលើកកម្ពស់សមត្ថភាពសន្តិសុខអ៊ីនធឺណិតរបស់ប្រទេស។

ចំណែកនាយករដ្ឋមន្ត្រី លោក Anwar Ibrahim ដែលបានជួបជាមួយលោក Nadella នៅថ្ងៃព្រហស្បតិ៍នេះ បាននិយាយថា ការវិនិយោគនេះបានគាំទ្រដល់កិច្ចខិតខំប្រឹងប្រែងរបស់ម៉ាឡេស៊ី ក្នុងការអភិវឌ្ឍសមត្ថភាព AI របស់ខ្លួន៕