រដ្ឋមន្ត្រីក្រសួងពាណិជ្ជកម្មរបស់ប្រទេសនេះ បាននិយាយថា ក្រុមតាលីបង់ បានយល់ព្រមជាមួយប្រទេសកាហ្សាក់ស្ថាន និងតួម៉េនីស្ថាន ដើម្បីសាងសង់មជ្ឈមណ្ឌលដឹកជញ្ជូននៅប្រទេសអាហ្វហ្គានីស្ថានភាគខាងលិច ក្នុងគោលបំណងធ្វើឲ្យប្រទេសដែលហែកហួរដោយសង្រ្គាមក្លាយជាចំណុចដឹកជញ្ជូនដ៏សំខាន់សម្រាប់ការនាំចេញក្នុងតំបន់ រួមទាំងប្រេងពីប្រទេសរុស្ស៊ី ទៅកាន់អាស៊ីខាងត្បូងផងដែរ។

បន្ទាប់ពីកិច្ចប្រជុំរវាងតំណាងនៃប្រទេសទាំងបីក្នុងរដ្ឋធានីអាហ្វហ្គានីស្ថានកាលពីសប្តាហ៍មុន រដ្ឋមន្ត្រីក្រសួងពាណិជ្ជកម្មស្តីទីតាលីបង់ លោក Nooruddin Azizi បានប្រាប់សារព័ត៌មានរ៉យទ័រថា ក្រុមបច្ចេកទេស នឹងបង្កើតកិច្ចព្រមព្រៀងជាលាយលក្ខណ៍អក្សរ ក្នុងរយៈពេលពីរខែលើផែនការផ្លូវការសម្រាប់មជ្ឈមណ្ឌលនេះ ដែលប្រទេសទាំងបីនឹងវិនិយោគ បន្ទាប់ពីការចរចារយៈពេល ៦ខែ។

នៅពេលដែលជំនួយបរទេសដល់អាហ្វហ្គានីស្ថានធ្លាក់ចុះ ហើយសេដ្ឋកិច្ចកសិកម្មភាគច្រើន ត្រូវបានបំផ្លាញដោយគ្រោះរាំងស្ងួតជាប់រហូត រដ្ឋាភិបាលតាលីបង់ដែលមិនទទួលស្គាល់ជាផ្លូវការ បានប្រឈមមុខនឹងសំណួរអំពីរបៀបផ្តល់មូលនិធិដល់ការអភិវឌ្ឍ និងជៀសវាងការជាប់គាំងសេដ្ឋកិច្ច។

លោក Azizi បាននិយាយថា មជ្ឈមណ្ឌលថ្មីនេះ គឺជាផ្នែកមួយនៃកិច្ចខិតខំប្រឹងប្រែងកាន់តែទូលំទូលាយ ដើម្បីទាញយកអត្ថប្រយោជន៍ពីទីតាំងយុទ្ធសាស្ត្ររបស់ប្រទេសអាហ្វហ្គានីស្ថាន ដែលធ្លាប់ជាផ្លូវឆ្លងកាត់សម្រាប់ផ្លូវពាណិជ្ជកម្មផ្លូវសូត្របុរាណ ដែលស្ថិតនៅចន្លោះអាស៊ីខាងត្បូង និងកណ្តាល និងមានព្រំដែនជាមួយប្រទេសចិន និងអ៊ីរ៉ង់។