យោងតាមរបាយការណ៍របស់អង្គការសហប្រជាជាតិ (UN) ដែលចេញផ្សាយ នៅថ្ងៃព្រហស្បតិ៍ (ទី២ ខែមេសា) នេះ បានលើកឡើងថា ការសាងសង់ផ្ទះឡើងវិញ នៅតំបន់ហ្កាហ្សាស្ទ្រីប អាចបន្លាយពេលវេលាចូលទៅដល់សតវត្សរ៍ក្រោយ ប្រសិនបើល្បឿនកើតមានឡើងស្រដៀងនឹងនិន្នាការនៃជម្លោះពីមុននេះ។

គួរបញ្ជាក់ថា រយៈពេលជិត ៧ខែនៃការទម្លាក់គ្រាប់បែករបស់អ៊ីស្រាអែល បានបណ្តាលឲ្យមានការខូចខាតរាប់ពាន់លានដុល្លារ ដោយធ្វើឲ្យអគារបេតុងខ្ពស់ៗជាច្រើនខ្នងបាក់ដួលរលំទៅជាទៅជាគំនរបាក់បែក ហើយមន្ត្រី UN បានប្រដូចទិដ្ឋភាពនៃការបំផ្លិចបំផ្លាញនេះទៅនឹង «ផ្ទៃឋានព្រះចន្ទ»។

ទិន្នន័យរបស់ប៉ាឡេស្ទីន បង្ហាញថា ផ្ទះសម្បែងប្រហែល ៨០.០០០ខ្នង ត្រូវបានបំផ្លាញ នៅក្នុងជម្លោះដែលបង្កឡើងដោយការវាយប្រហារដ៏សាហាវរបស់ក្រុមសកម្មប្រយុទ្ធហាម៉ាសលើភាគខាងត្បូងអ៊ីស្រាអែលកាលពីថ្ងៃទី៧ ខែតុលា។ ហើយការវាយប្រហារតបវិញរបស់អ៊ីស្រាអែល បានសម្លាប់ប្រជាជនប៉ាឡេស្ទីនរាប់ម៉ឺននាក់។

ការវាយតម្លៃដែលចេញផ្សាយដោយកម្មវិធីអភិវឌ្ឍន៍របស់អង្គការសហប្រជាជាតិ (UNDP) បានឲ្យដឹងថា តំបន់ហ្កាហ្សា ត្រូវការពេល «ប្រហែល ៨០ឆ្នាំ ដើម្បីសាងសង់ឡើងវិញនូវលំនៅឋានដែលត្រូវបានបំផ្លាញទាំងស្រុង»។ ការវាយតម្លៃរបស់ UNDP ធ្វើឲ្យមានការព្យាករណ៍ជាបន្តបន្ទាប់អំពីផលប៉ះពាល់ដល់សេដ្ឋកិច្ចសង្គមនៃសង្រ្គាមនេះ ដោយផ្អែកលើរយៈពេលនៃជម្លោះបច្ចុប្បន្ន ដោយបង្ហាញឲ្យឃើញពីទុក្ខវេទនា ដែលកំពុងបន្តមានជាច្រើនទសវត្សរ៍៕