នៅព្រឹកថ្ងៃទី៣ ខែឧសភា ឆ្នាំ២០២៤នេះ ឯកឧត្តម ស៊ុន ចាន់ថុល ឧបនាយករដ្ឋមន្ត្រីអនុប្រធានទី១ ក្រុមប្រឹក្សាអភិវឌ្ឍកម្ពុជា បានធ្វើបទបង្ហាញអំពីការខិតខំប្រឹងប្រែងរបស់ក្រុមប្រឹក្សាអភិវឌ្ឍកម្ពុជា ក្នុងការអូសទាញវិនិយោគ ផែនការរួមទាំងសមិទ្ធផលសំខាន់ៗរបស់រាជរដ្ឋាភិបាល អាណត្តិទី៧ និងគម្រោងព្រែកជីកហ្វូណនតេជោជូនដល់អង្គទូតទាំងអស់នៅកម្ពុជា នៅក្រុមប្រឹក្សាអភិវឌ្ឍន៍កម្ពុជា។
កិច្ចប្រជុំនេះមានការចូលរួមពីអគ្គរាជទូត/ រដ្ឋទូត និងតំណាងស្ថានទូតសរុបចំនួន ២៧ នាក់ ក្នុងនោះមានអគ្គរាជទូត/រដ្ឋទូតចំនួន ៥ នាក់ និងតំណាងស្ថានទូតចំនួន ២២ នាក់។ ចំពោះស្ថានទូតវៀតណាមមានតំណាងចំនួន ២ នាក់បានចូលរួមផងដែរ។
ជាកិច្ចចាប់ផ្ដើមនៃកិច្ចប្រជុំ ឯកឧត្តម ស៊ុន ចាន់ថុល ឧបនាយករដ្ឋមន្ត្រីអនុប្រធានទី១ ក្រុមប្រឹក្សាអភិវឌ្ឍកម្ពុជា បានធ្វើបទបង្ហាញអំពីកិច្ចខិតខំប្រឹងប្រែងរបស់កម្ពុជា ជាពិសេសក្រោមការដឹកនាំដោយសម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្រ្ដីនៃកម្ពុជា កាលពីអាណត្តិមុនៗ និងបានផ្ដួចផ្ដើមបង្កើតគម្រោងព្រែកជីកនេះ និងក្រោមការដឹកនាំដោយសម្ដេចមហាបវរធិតបី ហ៊ុន ម៉ាណែត នាយករដ្ឋមន្រ្ដីនៃកម្ពុជាក្នុងអាណត្តិទី៧នេះ បានយកចិត្តទុកដាក់ និងខិតខំការសាង អភិវឌ្ឍសង្គមសេដ្ឋកិច្ចរបស់កម្ពុជា ក្នុងនោះកម្រោងព្រែកជីកហ្វូណនតេជោ គឺជាគម្រោងមួយដែលមានការសិក្សាច្បាស់លាស់ពីអ្នកជំនាញជាតិ-អន្តរជាតិលំដាប់ពិភពលោកជិត ៥០ជាង ប្រើរយៈពេល ២៦ខែទម្រាំឈានដល់ការសម្រេចអនុវត្តផ្លូវការគម្រោងព្រែកជីកហ្វូនណនតេជោជាផ្លូវការ។
ឯកឧត្តម ឧបនាយករដ្ឋមន្ត្រី បានធ្វើបទបង្ហាញយ៉ាងលម្អិតទៅកាន់ អគ្គរាជទូត/រដ្ឋទូត និងតំណាងស្ថានទូតនានាអំពីគុណប្រយោជន៍ ផ្នែកសេដ្ឋកិច្ច និងសង្គមនៃការអនុវត្តគម្រោងព្រែកជីកហ្វូណនតេជោនេះ។ ឯកឧត្តម ឧបនាយករដ្ឋមន្ត្រី បញ្ជាក់ថា គម្រោងព្រែកជីកនេះ កម្ពុជាបានសិក្សាច្បាស់លាស់រួចហើយ គឺមិនបង្កផលប៉ះពាល់ដល់បណ្ដាប្រទេសជាមិត្តជិតខាងឬប្រជាពលរដ្ឋនៅក្នុងប្រទេសកម្ពុជាឡើយ។ ប៉ុន្ដែផ្ទុយទៅវិញបានផ្ដល់ផលប្រយោជន៍ជាច្រើនដល់ប្រជាពលរដ្ឋ និងសេដ្ឋកិច្ចកម្ពុជា ជាពិសេសពលរដ្ឋជាង ១ លាននាក់ ដែលរស់នៅតាមបណ្ដោយព្រែកជីកនេះ។
ឯកឧត្តម ឧបនាយករដ្ឋមន្រ្ដី បានបញ្ជាក់ថា ការកសាងព្រែកជីកហ្វូណនតេជោ បានកសាងឡើងតាមរយៈព្រែកជីកចាស់របស់កម្ពុជាដែលធ្លាប់មានស្រាប់ចាប់តាំងពីការកសាងបណ្ដាញផ្លូវទឹកចាស់របស់អាណាចក្រហ្វូណន។ ដូច្នេះគម្រោងនៃការកសាងព្រែកជីកនេះមិនត្រឹមតែមិនប៉ះពាល់ដល់បរិស្ថាន និងសង្គមប៉ុណ្ណោះទេ ប៉ុន្ដែបានជួយសម្រួលជាច្រើនទៅដល់សេដ្ឋកិច្ចកម្ពុជា និងប្រទេសជិតខាងជាមិត្ត។ ឯកឧត្តមបន្តថា តាមរយៈគម្រោងព្រែកជីកនេះក៏នឹងចូលរួមបង្កើននូវប្រភពជីវៈចម្រុះប្រភពត្រីបន្ថែមទៀតនៅកម្ពុជា កាន់តបន្ថយគ្រោះទឹកជំនន់ និងគ្រោះរាំងស្ងួតផងដែរ។
ឯកឧត្តមឧបនាយករដ្ឋមន្រ្ដីបានឱ្យដឹងថា តាមរយៈលទ្ធផលនៃការគណនា អត្រាចំណេញត្រឡប់មកវិញផ្នែកសេដ្ឋកិច្ច (Economic Internal Rate of Return – EIRR) លទ្ធផលបង្ហាញថា គម្រោងនេះមានតម្លៃសេដ្ឋកិច្ចខ្ពស់ និងផ្ដល់ផលចំណេញច្រើនរហូតដល់ ២០% ទៅ ៣១%។ ក្រៅពីនេះតាមរយៈគម្រោងនេះក៏បានផ្ដល់ផលប្រយោជន៍ជាច្រើនដូចជាការបង្កើតកំពង់ផែស្វយ័តក្រុងព្រះសីហនុ និងភ្នំពេញ និងកំពង់ផែផ្សេងទៀត។ ជំរុញការអភិវឌ្ឍទីក្រុង និងនគរូបនីយកម្មរួមនឹងការជំរុញការរីកចម្រើនផ្នែកអចលនទ្រព្យនៅតាមបណ្ដោយព្រែកជីកនេះផងដែរ។
ឯកឧត្តមឧបនាយករដ្ឋមន្រ្ដី បានបញ្ជាក់ថា ការអនុវត្តគម្រោងនេះក៏មានក្រុមការងារបច្ចេកទេសដែលជាដៃគូអន្តរជាតិបានចូលរួមផងដែរ ក្នុងនោះដូចជា ជំនាញការរបស់ JICA, ADB និង MRCS, ជំនាញការអន្តរជាតិផ្នែកកំពង់ផែ និងផ្លូវទឹក, មេធាវីអន្តរជាតិជំនាញការច្បាប់ទឹក និងកិច្ចព្រមព្រៀងមេគង្គ ១៩៩៥ ផងដែរ។
សូមជម្រាបថា គម្រោងព្រែកជីកហ្វូណនតេជោ ជាគម្រោងដែលតភ្ជាប់ផ្លូវទឹករវាងទន្លេទៅកាន់សមុទ្រដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ។ គម្រោងព្រែកជីកនេះ និងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា ជាពិសេសវិស័យដឹកជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា-ចម្ងាយ ការខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាកាត់ បន្ថយនីតិវិធីសម្រាប់នាវា និងបែបបទក្នុងការឆ្លងកាត់ទំនិញពីកម្ពុជាទៅសមុទ្រ ហើយនឹងបង្កើតតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍន៍ផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក ខណៈគម្រោងនេះគ្រោងចាប់ផ្ដើមអនុវត្តនៅចុងឆ្នាំ២០២៤ ឬដើមឆ្នាំ២០២៥ ខាងមុខ៕ អត្ថបទៈ វ៉ន ដារ៉ា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
