យោងតាមអង្គភាពសង្កេតអាកាសធាតុរបស់ទីក្រុងហុងកុង បានឱ្យដឹងថា ទីក្រុងនេះបានជួបប្រទះនឹងអាកាសធាតុក្តៅបំផុតក្នុងខែមេសា ដែលជាកម្រិតខ្ពស់បំផុតក្នុងកំណត់ត្រា ជាមួយនឹងសីតុណ្ហភាពប្រចាំថ្ងៃជាមធ្យម ២៦,៤ អង្សាសេ។ នេះគឺជាសីតុណ្ហភាពខ្ពស់បំផុតដែលបានកត់ត្រាទុកសម្រាប់ខែមេសា ក្នុងរយៈពេល ១៤០ ឆ្នាំរបស់ហុងកុង ចាប់តាំងពីកំណត់ត្រាឧតុនិយមបានចាប់ផ្តើមនៅឆ្នាំ១៨៨៤ មក។

ក្រុមសង្កេតនេះបានប្រកាសនៅលើប្រព័ន្ធផ្សព្វផ្សាយសង្គមថា «រដូវក្តៅមិនទាន់មកដល់ទេ ប៉ុន្តែខែមេសា គឺក្តៅខ្លាំងបំផុតបាត់ទៅហើយ»។ ទិន្នន័យពីអ្នកសង្កេតការណ៍បានបង្ហាញថា ទីក្រុងហុងកុង ដែលជាទីក្រុងតំបន់ត្រូពិចរបស់ចិន បាននឹងកំពុងប្រឈមមុខនឹងកម្ដៅខ្លាំងឡើងៗក្នុងរយៈពេលប៉ុន្មានឆ្នាំចុងក្រោយនេះ ដោយបានមើលឃើញកំណត់ត្រាសីតុណ្ហភាពខ្ពស់ជាច្រើន ទាំងប្រចាំថ្ងៃ និងប្រចាំខែ ចាប់តាំងពីឆ្នាំ ២០១៩ មក។

នៅថ្ងៃទី២៧ ខែមេសា ទីក្រុងនេះបានបង្កើតកំណត់ត្រាសីតុណ្ហភាពប្រចាំថ្ងៃថ្មីសម្រាប់ខែមេសា ដោយកម្រិតអតិបរមាប្រចាំថ្ងៃអតិបរមាឈានដល់ ២៨,៨ អង្សាសេ និងកម្រិតទាបបំផុតប្រចាំថ្ងៃគឺ ២៧,៧ អង្សាសេ។ នេះគឺជាកំណើនដ៏ខ្ពស់ពីកម្រិតសីតុណ្ហភាពក្ដៅបំផុតប្រចាំថ្ងៃជាមធ្យមពី ២១,១ ដល់ ២៥,៦ អង្សាសេ ដែលបានកត់ត្រានៅចន្លោះឆ្នាំ១៩៩១ និង២០២០។

ខែមេសា ដែលក្តៅខុសពីធម្មតានេះ កើតឡើងបន្ទាប់ពីរដូវរងា ដែលក៏មានអាកាសធាតុក្តៅខុសពីធម្មតារបស់ទីក្រុងហុងកុង ចាប់ពីខែធ្នូ ដល់ខែកុម្ភៈ ហើយក្នុងខែមីនា ទីក្រុងនេះក៏បានជួបប្រទះកម្រិតក្ដៅខ្លាំងជាងមុនផងដែរ។ ការព្យាកររបស់អង្គភាពអាកាសធាតុនោះបានព្រមានថា សីតុណ្ហភាពក្ដៅលើសពីធម្មតានឹងកើតឡើងពេញមួយឆ្នាំ២០២៤ នៅក្នុងទីក្រុងចិនដែលធ្លាប់តែត្រជាក់មួយនេះ៕