កំពង់ឆ្នាំង៖ ដោយសារអាកាសធាតុនៅក្នុងខេត្តកំពង់ឆ្នាំង នៅតែបន្ត​ក្តៅ​ចាប់​ពី​៤០​ដល់​៤២​អង្សា​នោះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បាន​សំរេច​ប្រើ​ប្រាស់​រថយន្ត​ពន្លត់​អគ្គិភ័យ​​ចំនួន៥គ្រឿង បាញ់ទឹកលើដំបូលអាគារសិក្សានៅតាមវិទ្យាល័យ អនុវិទ្យាល័យ សាលា​បឋម​​សិក្សា​​មួយ​ចំនួន​ក្នុងក្រុងកំពង់ឆ្នាំង អោយកំដៅថយចុះ ក្រោយ​សីតុណ្ហភាព​នៅ​ក្នុង​ខេត្តកំពង់ឆ្នាំង បន្តក្តៅចាប់ពី៤០ដល់៤២អង្សាសេ ។ ការ​យក​រថយន្ត​ពន្លត់​អគ្គិភ័យ​បាញ់​ទឹក​លើ​ដំបូល​​អគារសិក្សានេះ ដើម្បីជួយបន្យកំដៅ និងរក្សាសុខភាពសិស្សានុសិស្សទាំងអស់អោយល្អ។

លោក អឿ ម៉េងចុង នាយកវិទ្យាល័យព្រះបាទសុរាម្រឹត ក្រុងកំពង់ឆ្នាំងបានបញ្ជាក់ថា នៅក្នុង​វិទ្យាល័យ​របស់​លោក លោកបានកែប្រែម៉ោង​សិក្សា​រប​ស់​សិស្ស​មិន​អោយ​រៀន​ចំ​ពេល​មេឃ​កំពុង​តែ​​ក្តៅ​ខ្លាំង​នោះឡើយ ព្រោះសុខភាពសិស្សានុសិស្សជាកត្តាចាំបាច់បំផុត។ នៅក្នុងថ្ងៃទី០៣ ខែ​ឧសភា ឆ្នាំ២០២៤នេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បាន​អោយ​រថយន្ត​ពន្លត់​អគ្គិភ័យ​ចំ​នួន ៥គ្រឿង ដឹកទឹកមកបាញ់លើដំបូលអាគារសិក្សាអោយកំដៅថយចុះ រក្សា​បាន​នូវ​សីតុណ្ហភាព​ក្នុង​បន្ទប់សិក្សាអោយនៅទាប និងរក្សាការពារបាននូវសុខភាពគ្រូ និងសិស្ស​ក្នុង​ម៉ោង​សិក្សា​ផង​ដែរ​។

ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បាន​អំពាវនាវ​អោយ​អាណាព្យាបាល​សិស្ស​ទាំង​អស់ ត្រូវបន្តតាមដានសុខភាពកូនៗជារៀងរាល់ថ្ងៃ ប្រសិនបើមាន​សុខភាព​មិន​ស្រួល​ត្រូវ​ប្រញាប់​បញ្ជូន​កូនៗមកមន្ទីរពេទ្យ ឬមណ្ឌលសុខភាពនៅក្បែរ។ ដោយឡែកមនុស្សចាស់ជរា ក៏​ត្រូវយកចិត្តទុកដាក់ថែរក្សាពួកគាត់ផងដែរ ព្រោះកម្ដៅ​ក្តៅ​ខ្លាំង​អាច​បង្ក​ហានិភ័យ​ដល់​សុខ​ភាព​កុមារ និងមនុស្សចាស់។ នៅពេលបងប្អូនចាកចេញពីគេហដ្ឋាន ត្រូវពិនិត្យមើល​ប្រព័ន្ធ​ភ្លើង​អគ្គិសនី ​ភ្លើងចង្ក្រាន និងភ្លើងទៀនធូប ហើយត្រូវបិទ ឬពន្លត់ទាំងអស់កុំ​អោយ​មាន​ករណី​ភ្លើង​ឆេះ​ផ្ទះ​ដោយ​សារការធ្វេសប្រហែសរបស់យើងអោយសោះ ៕ កាំង ហុងវាស្នា