ការតវ៉ាប្រឆាំងសង្រ្គាមហ្កាហ្សា នៅសកលវិទ្យាល័យ និងមហាវិទ្យាល័យសហរដ្ឋអាមេរិកជាង ៣០ ទីតាំងបាននឹងកំពុងតែតានតឹងខ្លាំងកាលពីថ្ងៃព្រហស្បតិ៍ (០២ ឧសភា) ដោយមានការមិនសប្បាយចិត្តបន្ថែមទៀត ដែលបានបង្កឡើងពីការអនុវត្តដ៏តឹងតែងរបស់នគរបាល។ យោងតាមតួលេខចុងក្រោយដោយសារព័ត៌មាន AP បានឱ្យដឹងថាមនុស្សជាង ២.០០០ នាក់ត្រូវបានចាប់ខ្លួននៅទូទាំងប្រទេស។

យោងតាមនគរបាលដែលនៅសាកលវិទ្យាល័យកាលីហ្វ័រនីញ៉ាក្នុងក្រុងឡូសអេនជឺលេស (UCLA) បានឱ្យដឹងថា កាលពីថ្ងៃព្រហស្បតិ៍ មនុស្សជាង ២០០ នាក់ត្រូវបានចាប់ខ្លួននៅជំរំតវ៉ាគាំទ្រប៉ាឡេស្ទីននៅក្នុងបរិវេណសាលា បន្ទាប់ពីពួកគេបដិសេធមិនចាកចេញពីតំបន់នេះតាមការស្នើសុំ។ ហើយក៏មានការចាប់ខ្លួនមនុស្សជាច្រើនរយនាក់ទៀតពីទីតាំងតវ៉ាផ្សេងៗនៅតាមសាកលវិទ្យាល័យ។

ចាប់តាំងពីការចាប់ខ្លួននិស្សិតជាងមួយរយនាក់ ដែលតវ៉ានៅសកលវិទ្យាល័យ កូឡុំប៊ី (Columbia) កាលពីថ្ងៃទី១៨ ខែមេសា មក វិទ្យាស្ថានអប់រំរបស់អាមេរិកជាច្រើនបានមើលឃើញការតវ៉ាស្រដៀងគ្នានេះ ខណៈដែលនិស្សិតទាមទារឱ្យសាកលវិទ្យាល័យដកខ្លួនចេញពីក្រុមហ៊ុនដែលទាក់ទងនឹងអ៊ីស្រាអែល ហើយអំពាវនាវឱ្យមានបទឈប់បាញ់នៅហ្កាហ្សា។

អន្តរាគមន៍របស់នគរបាល បានបង្កឱ្យមានជម្លោះ ដែលនាំឱ្យមានការមិនពេញចិត្តយ៉ាងទូលំទូលាយចំពោះការប្រើដៃធ្ងន់របស់អាជ្ញាធរ ហើយជួនកាលធ្វើឱ្យមានអំពើហិង្សា និងការប៉ះទង្គិច។

ការស្ទង់មតិរបស់សារព័ត៌មាន CNN ថ្មីៗនេះបានរកឃើញថា ចំនួន ៧១ ភាគរយនៃមនុស្សពេញវ័យជនជាតិអាមេរិក ដែលត្រូវបានស្ទង់មតិ មិនពេញចិត្តនឹងការគ្រប់គ្រងរបស់រដ្ឋបាលលោកប្រធានាធិបតី ចូ បៃដិន (Joe Biden) លើជម្លោះអ៊ីស្រាអែល និងប៉ាឡេស្ទីន ហើយក្នុងចំណោមនោះ អ្នកដែលមានអាយុក្រោម ៣៥ ឆ្នាំ មានភាគរយមិនពេញចិត្តខ្ពស់ជាងគេ៕