ក្រសួងការបរទេសកូរ៉េខាងត្បូង កាលពីថ្ងៃព្រហស្បតិ៍ (០២ ឧសភា) បានបង្កើនកម្រិតប្រកាសអាសន្នភេរវកម្មសម្រាប់ការិយាល័យការទូតចំនួនប្រាំនៅក្នុងតំបន់ ដោយលើកឡើងពីព័ត៌មានចារកម្មសម្ងាត់ថា កូរ៉េខាងជើងអាចប៉ុនប៉ងធ្វើបាបមន្ត្រីរបស់ខ្លួន។ 

ក្រសួងបាននិយាយនៅក្នុងសេចក្តីថ្លែងការណ៍មួយថា ទីតាំងទាំងប្រាំនោះរួមមានស្ថានទូតរបស់ទីក្រុងសេអ៊ូលនៅប្រជាជាតិអាស៊ានចំនួនបី ព្រមទាំងស្ថានកុងស៊ុលនៅទីក្រុង វ្ល៉ាឌីវ៉ូស្តុក (Vladivostok) ប្រទេសរុស្ស៊ី និងទីក្រុង ស៊ិនយ៉ាង (Shenyang) ប្រទេសចិន។

ក្រសួងការបរទេសនោះនិយាយថា កម្រិតប្រកាសអាសន្នអំពើភេរវកម្មត្រូវបានលើកឡើងពីកម្រិត «យកចិត្តទុកដាក់» ទៅកម្រិត «ប្រកាសអាសន្ន» ដែលជាកម្រិតខ្ពស់បំផុតទីពីរក្នុងចំណោមចំណាត់ថ្នាក់ទាំងបួនរបស់កូរ៉េខាងត្បូង ដែលបង្ហាញថា ឱកាសនៃការវាយប្រហារគឺខ្ពស់ខ្លាំងណាស់។

ដោយឡែក សេវាស៊ើបការណ៍សម្ងាត់ជាតិរបស់កូរ៉េខាងត្បូង (NIS) បាននិយាយថា ខ្លួនមាន «ការចង្អុលបង្ហាញមួយចំនួនដែលថា កូរ៉េខាងជើងកំពុងរៀបចំធ្វើការវាយប្រហារភេរវកម្ម ប្រឆាំងនឹងមន្ត្រីការទូត និងប្រជាពលរដ្ឋរបស់កូរ៉េខាងត្បូង» ប៉ុន្តែមិនបានបញ្ជាក់លម្អិតអំពីលក្ខណៈនៃការគំរាមកំហែងនោះទេ។

ប្រព័ន្ធផ្សព្វផ្សាយដែលគ្រប់គ្រងដោយរដ្ឋាភិបាលរបស់កូរ៉េខាងជើង បានរិះគន់ការចោទប្រកាន់នៃអំពើភេរវកម្មប្រឆាំងនឹងខ្លួនថា ជាការខិតខំប្រឹងប្រែងដឹកនាំដោយសហរដ្ឋអាមេរិក ដើម្បីបង្ខូចកេរ្តិ៍ឈ្មោះគូប្រជែងរបស់ទីក្រុងវ៉ាស៊ីនតោន៕