យោងតាមប្រភពព័ត៌មានដែលដឹងអំពីការស៊ើបអង្កេត បាននិយាយថា អាជ្ញាធរប្រទេសម៉ិកស៊ិក បានរកឃើញសាកសពបីនាក់នៅក្នុងរដ្ឋ Baja California ជាកន្លែងដែលអ្នកទេសចរជនជាតិអាមេរិកម្នាក់ និងអូស្ត្រាលីពីរនាក់ ត្រូវបានគេរាយការណ៍ថា បានបាត់ខ្លួន។

យោងតាមការិយាល័យរដ្ឋអាជ្ញា នៃរដ្ឋ Baja California បាននិយាយថា បងប្អូនជនជាតិអូស្ត្រាលី Callum មានអាយុ៣៣ឆ្នាំ និង Jake Robinson មានអាយុ៣០ឆ្នាំ និងជនជាតិអាមេរិក Carter Rhoad មានអាយុ៣០ឆ្នាំ ត្រូវបានគេប្រទះឃើញចុងក្រោយនៅថ្ងៃទី២៧ ខែមេសា។ 

បុរសទាំងបីនាក់ បានមកជិះស្គីលើទឹកកម្សាន្តវិស្សមកាលនៅក្នុងទីក្រុង Ensenada ដែលធ្វើដំណើរប្រហែល៩០ នាទី ភាគខាងត្បូងព្រំដែនសហរដ្ឋអាមេរិក-ម៉ិកស៊ិក។

អាជ្ញាធរ បាននិយាយថា តង់ត្រូវបានគេរកឃើញនៅក្នុងតំបន់ដែលបុរសទាំងបីនាក់បាត់ខ្លួន ហើយពួកគេត្រូវបានរាយការណ៍ជាផ្លូវការថា បានបាត់ខ្លួនប៉ុន្មានថ្ងៃនេះ។ រថយន្តភីកអាប់ ពណ៌សមួយគ្រឿង ត្រូវបានគេរកឃើញនៅក្នុងតំបន់នោះផងដែរ ។

រដ្ឋ Baja California គឺជារដ្ឋមួយដែលពុំសូវមានសុវត្ថិភាពនៅប្រទេសម៉ិកស៊ិក ទោះបីជាតំបន់ទេសចរណ៍ដូចជានៅទីក្រុង Ensenada ត្រូវបានចាត់ទុកថាមានសុវត្ថិភាពក៏ដោយ។ ក្រសួងការបរទេសសហរដ្ឋអាមេរិក បានណែនាំឱ្យជនជាតិអាមេរិក ឲ្យពិចារណាឡើងវិញអំពីការធ្វើដំណើរទៅកាន់រដ្ឋនេះ ដោយសារតែមានអំពើឧក្រិដ្ឋកម្ម និងការចាប់ជំរិត។

ដោយត្រូវបានសួរអំពីការរកឃើញសាកសព អ្នកនាំពាក្យក្រសួងការបរទេស បាននិយាយថា យើងបានដឹងអំពីរបាយការណ៍ ហើយកំពុងតាមដានស្ថានការណ៍យ៉ាងជិតស្និត។ 

អ្នកនាំពាក្យក្រសួងការបរទេសអូស្ត្រាលី បាននិយាយថា ស្ថានទូតរបស់ពួកគេនៅម៉ិកស៊ិក កំពុងធ្វើការជាមួយអាជ្ញាធរម៉ិកស៊ិក និងនគរបាលសហព័ន្ធអូស្ត្រាលី។