ភ្នំពេញ៖ នៅព្រឹកថ្ងៃទី៥ ខែឧសភា ឆ្នាំ២០២៤នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា និងសហការី ព្រមទាំងមន្រ្តី បុគ្គលិក យុវជនកាកបាទក្រហម អញ្ជើញចូលរួមក្នុងពិធីបុណ្យសង្ឃទាន និងបង្សកូលឧទ្ទិសថ្វាយព្រះរាជមហាកុសលថ្វាយព្រះបរមសពសម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស ។

សរសេរនៅលើសៀវភៅក្រាំងមាស ចូលរួមលែកទុក្ខ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ក្នុងនាមសម្តេចព្រះមហាក្សត្រី ព្រះវររាជមាតាជាតិខ្មែរ ប្រធានកិត្តិយសកាកបាទក្រហមកម្ពុជា និងក្នុងនាមសម្តេចផ្ទាល់ សម្តេចប្រធានកាកបាទក្រហមកម្ពុជា ឧទ្ទិសមហាព្រះរាជកុសលនេះ ថ្វាយព្រះវិញ្ញាណក្ខន្ធព្រះបរមសពសម្តេចព្រះមហាសង្ឃរាជ សូមយាងទៅសោយសុខក្នុងសុគតិភព និងទីបំផុតយាងដល់ព្រះបរមសុខកុំបីឃ្លៀងឃ្លាតឡើយ។

ក្នុងពិធីបុណ្យសង្ឃទាន និងបង្សកូល ក្នុងថ្ងៃគម្រប់ទី ៦៩ នៅវត្តឧណ្ណាលោម នាថ្ងៃនេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានប្រគេនសម្ភារៈ ទយ្យវត្ថុ និងបច្ច័យរួមមាន៖ អង្ករ ៥តោន មី១០០កេះ ត្រីខ២០កេះ ទឹកបរិសុទ្ធ និងទឹកក្រូច២០០កេះ និងបច្ច័យ៥០លានរៀល។

ឧបត្ថម្ភសិស្ស និស្សិតក្មេងវត្ត និងអ្នកបំរើពិធីបុណ្យសរុប២៣០នាក់ ក្នុងម្នាក់ៗ ១០ម៉ឺនរៀល ព្រមទាំងចូលបច្ច៏យបុណ្យពីពុទ្ធបរិស័ទចូលរួមចំនួន ១០២៤០ដុល្លា។

សូមរម្លឹកថា សម្តេចព្រះអគ្គមហាសង្ឃរាជាធិបតីកិត្តិឧទ្ទេសបណ្ឌិត ទេព វង្ស សម្តេចព្រះមហាសង្ឃរាជនៃព្រះរាជាណាចក្រកម្ពុជា បានយាងចូលទីវង្គតនៅថ្ងៃចន្ទ ២រោជ ខែមាឃ ឆ្នាំថោះ បញ្ចស័ក ពស ២៥៦៧ ត្រូវនឹងថ្ងៃទី ២៦ ខែកុម្ភៈ ឆ្នាំ២០២៤ ក្នុងព្រះជន្មាយុ ៦៩ឆ្នាំ ដោយជរាពាធ។