នគរបាលអាមេរិកបានចាប់ខ្លួនបាតុករជាច្រើននាក់ កាលពីថ្ងៃសៅរ៍ (ទី៤ ខែឧសភា) នៅសាកលវិទ្យាល័យ Virginia (UVA) បន្ទាប់ពីបានប្រកាសពី «ការជួបជុំគ្នាដោយខុសច្បាប់» ខណៈដែលមនុស្សរាប់សិបនាក់ បានបោះជំរំគាំទ្រប៉ាឡេស្ទីន នៅក្នុងបរិវេណសាលា។

មន្ត្រីក្នុងសម្លៀកបំពាក់បង្ក្រាបកុបកម្មបានឈរជាជួរ នៅព្រឹកថ្ងៃនោះ ខណៈក្រុមបាតុករបាននាំគ្នាស្រែកបង្ហាញការតវ៉ារបស់ខ្លួន។ នគរបាលក្នុងតំបន់ និងក្នុងបរិវេណសាលា បានចូលទៅដល់កន្លែងបោះជំរំម៉ោងជិត ៣:០០ រសៀល ម៉ោងក្នុងតំបន់ (ត្រូវនឹងម៉ោង ១៩:០០ ម៉ោងសកល)។ ពួកគេបានរុះរើតង់យ៉ាងឆាប់រហ័ស ហើយទំនងជាបានចាប់ខ្លួនបាតុករជាច្រើននាក់។ 

យោងតាមប្រព័ន្ធផ្សព្វផ្សាយក្នុងស្រុក បានឲ្យដឹងថា ក្រុមបាតុករគាំទ្រប៉ាឡេស្ទីន បាន និងកំពុងប្រមូលផ្តុំគ្នានៅបរិវេណសាលា UVA រយៈពេល ៥ថ្ងៃ។

គួរបញ្ជាក់ថា ក្នុងរយៈពេលប៉ុន្មានថ្ងៃថ្មីៗនេះ និស្សិតនៅទូទាំងសហរដ្ឋអាមេរិក បានប្រមូលផ្តុំគ្នា ឬដំឡើងតង់ នៅតាមសាកលវិទ្យាល័យរាប់សិបកន្លែង ដើម្បីតវ៉ាប្រឆាំងនឹងសង្រ្គាមរបស់អ៊ីស្រាអែល នៅតំបន់ហ្កាហ្សា។ ក្រុមបាតុករបានអំពាវនាវឲ្យប្រធានាធិបតីលោក Joe Biden ដែលបានគាំទ្រអ៊ីស្រាអែល ឲ្យធ្វើការងារបន្ថែមទៀត ដើម្បីបញ្ឈប់ការបង្ហូរឈាម នៅដែនដីនេះ និងទាមទារឲ្យបណ្ដាសាលាសាកលវិទ្យាល័យដកខ្លួនចេញពីក្រុមហ៊ុនដែលគាំទ្ររដ្ឋាភិបាលអ៊ីស្រាអែល៕