នគរបាលអូស្ត្រាលី នៅថ្ងៃអាទិត្យ (ទី៥ ខែឧសភា) នេះ បានប្រាប់ឲ្យដឹងថា ពួកគេបានបាញ់សម្លាប់ក្មេងប្រុសម្នាក់ បន្ទាប់ពីក្មេងនោះបានចាក់បុរសម្នាក់ នៅរដ្ឋធានី Perth ភាគខាងលិចប្រទេសអូស្ត្រាលី នៅក្នុងការវាយប្រហារមួយ ដែលអាជ្ញាធរបាននិយាយថា មានលក្ខណៈដូចនឹងអំពើភេរវកម្ម។

អាជ្ញាធរប្រចាំរដ្ឋបានប្រាប់ថា សញ្ញាពីក្មេងប្រុសអាយុ ១៦ឆ្នាំ ប្រដាប់ដោយអាវុធដែលជាកាំបិតប្រើប្រាស់ក្នុងផ្ទះបាយ ត្រូវបានផ្សព្វផ្សាយតាមប្រព័ន្ធអ៊ីនធឺណិត ដោយបន្ថែមថា ពួកគេបានទទួលទូរសព្ទពីសមាជិកពាក់ព័ន្ធនៃសហគមន៍មូស្លីមក្នុងតំបន់ មុនពេលមានការវាយប្រហារនោះ ដែលបានកើតឡើងនៅយប់ថ្ងៃសៅរ៍។

នគរបាលបាននិយាយថា ការវាយប្រហារ នៅជាយក្រុង Willetton មាន «លក្ខណៈ» ដូចនឹងអំពើភេរវកម្ម ប៉ុន្តែមិនទាន់ត្រូវបានប្រកាសថា ជាអំពើភេរវកម្មទេ។ ពាក់ព័ន្ធនឹងអ្នកវាយប្រហារនេះ អំឡុងសន្និសីទតាមទូរទស្សន៍ រដ្ឋមន្ត្រីប្រចាំរដ្ឋ Western Australia លោក Roger Cook បានប្រាប់ថា៖ «នៅដំណាក់កាលនេះ វាហាក់ដូចជារូបគេប្រព្រឹត្តតែម្នាក់ឯងប៉ុណ្ណោះ»។ 

សមត្ថកិច្ចបានប្រាប់បន្ថែមថា ចំណែកជនរងគ្រោះដែលត្រូវបានចាក់ចំខ្នងនោះ កំពុងសម្រាកព្យាបាលនៅមន្ទីរពេទ្យ។ រីឯនាយករដ្ឋមន្ត្រីអូស្ត្រាលី លោក Anthony Albanese បាននិយាយថា លោកត្រូវបានរាយការណ៍ដោយសង្ខេបអំពីហេតុការណ៍នេះពីសំណាក់នគរបាល និងភ្នាក់ងារស៊ើបការណ៍សម្ងាត់ ដែលបញ្ជាក់បន្ថែមថា គ្មានការគំរាមកំហែងបន្តមាននោះទេ។

គួរបញ្ជាក់ដែរថា ឧបទ្ទវហេតុនេះកើតឡើងបន្ទាប់ពីនគរបាលរដ្ឋ New South Wales កាលពីខែមុន បានចោទប្រកាន់ក្មេងប្រុសជាច្រើននាក់ពីបទល្មើសទាក់ទងនឹងអំពើភេរវកម្ម នៅក្នុងការស៊ើបអង្កេតមួយ បន្ទាប់ពីមានការចាក់លើសង្ឃជាន់ខ្ពស់គ្រិស្តសាសនា Assyrian ខណៈពេលដែលសង្ឃអង្គនោះកំពុងផ្ដល់ឱវាទដោយមានការផ្សាយផ្ទាល់ នៅក្នុងទីក្រុងស៊ីដនី កាលពីថ្ងៃទី១៥ ខែមេសា។ ហើយការវាយប្រហារលើសង្ឃជាន់ខ្ពស់នោះ បានកើតមានឡើងបន្ទាប់ពីមានការចាក់មិនរើសមុខ រហូតបណ្ដាលឲ្យមនុស្សយ៉ាងហោចណាស់ ៦នាក់ ស្លាប់នៅឯផ្សារទំនើប ក្នុងទីក្រុងស៊ីដនី៕