ក្រោយបញ្ចប់ការប្រឡងរបស់បេក្ខជនទាំងជាង ៣ម៉ឺននាក់ គណៈកម្មការ​រៀបចំ​ការ​ប្រឡង​ប្រជែង​បាន​ចាប់ផ្តើមដំណើរការកែសន្លឹកកិច្ចការរបស់បេក្ខជននៅថ្ងៃទី ៦ ខែឧសភា ឆ្នាំ ២០២៤​នេះ។ ដំណាក់​កាល​កំណែ​នេះ​ប្រព្រឹត្តិទៅ​ដោយ​មាន​ការ​ចូលរួមពីអ្នកសង្កេតការណ៍មកពី​បណ្ដា​ស្ថាប័ន មន្ត្រីអង្គភាពប្រឆាំងអំពើពុករលួយ និងវត្តមានអ្នកកែប្រមាណ ២០០រូប។ ខណៈ​លទ្ធផល​គ្រោង​ប្រកាសនៅក្នុងសប្ដាហ៍នេះដែរ។ នេះជាការលើកឡើងរបស់ ឯកឧត្តម ខៀវ ច័ន្ទប៊ុនធឿន រដ្ឋលេខាធិការក្រសួងមុខងារសាធារណៈ និងជាប្រធានអនុគណៈកម្មការត្រួតពិនិត្យ និង​វាយតម្លៃដំណើរការប្រឡង។

ការធ្វើកំណែលើក្រដាសកិច្ចការបេក្ខជនប្រឡងគ្រូអនុវិទ្យាល័យទាំងជាង ៣ម៉ឺននាក់​បាន​ចាប់​ផ្ដើម​នៅថ្ងៃទី៦ ខែឧសភា ឆ្នាំ២០២៤នេះ។ ការធ្វើកំណែធ្វើឡើងនៅ​ទីតាំង​សាលា​ភូមិន្ទ​រដ្ឋបាល​តែ​មួយ​ប៉ុណ្ណោះ ដោយប្រមូលកិច្ចការមកពីមណ្ឌលប្រឡងទាំងបី មកកែរួមនៅទីតាំងតែមួយ។

ឯកឧត្តម ខៀវ ច័ន្ទប៊ុនធឿន បានឱ្យដឹងថា ដំណាក់កាលកំណែនេះ ក៏មិន​ខុស​ពី​ដំណាក់​កាល​ផ្សេង​នៃ​ដំណើរកា​រ​ប្រឡងនោះឡើយ។ ដំណាក់កាលកំណែ គឺនៅតែមានវត្ត​មាន​អ្នក​សង្កេតការណ៍​មក​ពីបណ្ដាស្ថាប័ន តំណាងសាកលវិទ្យាល័យ មន្ត្រីអង្គភាព​ប្រឆាំង​អំពើ​ពុក​រលួយ​។ ការចាប់ផ្ដើមដំបូងគឺ ការចុះលេខសម្ងាត់ កាត់សន្លឹកកិច្ចការ ប្រគល់​ជូន​បន្ត​ទៅ​ក្រុម​ការងារ​កំណែ ​និងឈានទៅការបូកស្រង់ពិន្ទុ។ គ្រប់ដំណាក់កាលទាំងអស់ គឺមានការ​ត្រួត​ពិនិត្យ​តាម​ដាន ពីអ្នកសង្កេតការណ៍ទាំងអស់ ដើម្បីធានាភាពត្រឹមត្រូវ ជូនបេក្ខជន។

ឯកឧត្តម បញ្ជាក់ដែរថា សម្រាប់ការធ្វើកំណែនេះ ទោះចំនួន​បេក្ខជន​ប្រឡង​មាន​ចំនួន​រហូត​ដល់​ជាង​ ៣ម៉ឺននាក់ក្ដី ការប្រកាសលទ្ធផលតាមការគ្រោង គឺប្រកាសជូននៅក្នុងសប្ដាហ៍នេះតែម្ដង ហើយ​ដើម្បីពន្លឿនលើដំណាក់កាលកំណែ គណៈកម្មការបានដាក់អ្នកកែប្រមាណ ២០០នាក់។

ឯកឧត្តមលើកឡើងទៀតថា អ្នកតាក់តែងវិញ្ញាសា គឺជាអ្នកចេញអាត្រាកំណែ។ រីឯ​អ្នក​កែ​ក្រដាស​កិច្ច​ការ​ជាក់ស្ដែង ជាបុគ្គលផ្សេងទៀត ដែលជ្រើសរើសចេញពីសាលាភូមិន្ទរដ្ឋបាល ដោយ​កែ​ផ្អែក​លើ​អត្រា​កំណែដែលផ្ដល់ជូន។

សម្រាប់លទ្ធផលនៃការប្រឡងរយៈពេល ៤ថ្ងៃជាប់គ្នានេះ ជាលទ្ធផលសម្រាំងលើកទី ១។ ការ​ធ្វើ​កំណែ​នេះ នឹងជ្រើសរើសបេក្ខជនដែលទទួលបានពិន្ទុខ្ពស់ជាង ១៣០០នាក់ សម្រា​ប់​ត្រៀម​ខ្លួន​ក្នុង​ការ​ប្រឡងលើកទីពីរ។ គួរបញ្ជាក់ឱ្យដឹងថា លទ្ធផលចុងក្រោយនៃការប្រឡងគ្រូអនុវិទ្យាល័យ គឺកំណត់យកអ្នកជាប់ត្រឹមតែ ៤៤១ នាក់ប៉ុណ្ណោះ៕ អត្ថបទ៖ គឹមហុក