យោធាអ៊ីស្រាអែលបានចេញការអំពាវនាវឲ្យប្រជាជននៅភាគខាងកើតទីក្រុង Rafah «ជម្លៀសចេញជាបន្ទាន់» ពោលគឺមានរយៈពេល ១ថ្ងៃបន្ទាប់ពីរដ្ឋមន្ត្រីការពារជាតិរបស់ប្រទេសនេះ បានប្រាប់កងទ័ពនៅខាងក្នុងតំបន់ហ្កាហ្សា ឲ្យរង់ចាំពីការមាន «សកម្មភាពខ្លាំងក្លា នៅទីក្រុង Rafah នាពេលអនាគតដ៏ខ្លី»។

លោក Avichay Adraee ប្រធានផ្នែកប្រព័ន្ធផ្សព្វផ្សាយអារ៉ាប់នៃអង្គភាពអ្នកនាំពាក្យ IDF (កងកម្លាំងការពារជាតិអ៊ីស្រាអែល) បានសរសេរថា៖ «ដើម្បីសុវត្ថិភាពរបស់អ្នកទាំងអស់គ្នា កងទ័ពការពារជាតិជំរុញឲ្យអ្នកជម្លៀសជាបន្ទាន់ទៅកាន់តំបន់មនុស្សធម៌ដែលត្រូវបានពង្រីកយ៉ាងធំ នៅប៉ុស្តិ៍ត្រួតពិនិត្យ»។

ចំណែកអ្នកនាំពាក្យរបស់ IDF បាននិយាយនៅក្នុងសន្និសីទ នាថ្ងៃចន្ទ (ទី៦ ខែឧសភា) នេះ ថា វាគឺជា «ប្រតិបត្តិការជម្រើសដែលត្រូវបានកំណត់ឡើង ដើម្បីជម្លៀសជាបណ្តោះអាសន្ន» និង «មិនមែនជាការជម្លៀសក្នុងទ្រង់ទ្រាយធំនោះទេ»។

គួរបញ្ជាក់ថា អ៊ីស្រាអែលបានផ្តល់សញ្ញាម្តងហើយម្តងទៀតអំពីផែនការបញ្ជូនទ័ពចូលទៅក្នុងទីក្រុង Rafah ជាទីក្រុងភាគខាងត្បូងជាប់ព្រំដែនជាមួយប្រទេសអេហ្ស៊ីប ដែលជនភៀសខ្លួនប៉ាឡេស្ទីនជាង ១លាននាក់ ត្រូវបានគេជឿថា បានភៀសខ្លួនទៅកាន់ទីនោះ តាំងពីថ្ងៃទី៧ ខែតុលា។

រដ្ឋមន្ត្រីការពារជាតិអ៊ីស្រាអែល លោក Yoav Galant កាលពីព្រឹកថ្ងៃអាទិត្យ (ទី៥ ខែឧសភា) បានប្រាប់កងទ័ពនៅខាងក្នុងតំបន់ហ្កាហ្សាស្ទ្រីប ឲ្យរង់ចាំពីការមាន «សកម្មភាពដ៏ខ្លាំងក្លា នៅទីក្រុង Rafah នាពេលខាងមុខ និងនៅកន្លែងផ្សេងទៀតទូទាំងដែនដីនេះ» ដោយលោកលើកឡើងថា គឺដោយសារតែក្រុមហាម៉ាស មិនមានបំណងឈានដល់កិច្ចព្រមព្រៀងនោះទេ ពាក់ព័ន្ធនឹងចំណាប់ថ្នូរ និងបទឈប់បាញ់៕