ប្រព័ន្ធផ្សព្វផ្សាយអ៊ីស្រាអែលមួយ នៅថ្ងៃចន្ទ (៦ ឧសភា) នេះ បានឲ្យដឹងថា កងកម្លាំងប្រដាប់អាវុធរបស់អ៊ីស្រាអែល បានចាប់ផ្តើមជម្លៀសជនស៊ីវិលប៉ាឡេស្ទីនចេញពីទីក្រុង Rafah មុនពេលមានការវាយប្រហារគំរាមកំហែងទៅលើទីក្រុងហ្កាហ្សាភាគខាងត្បូង។

តាមរយៈវិទ្យុទាក់ទងកងទ័ព យោធាមិនបានផ្តល់ការបញ្ជាក់ភ្លាមៗអំពីរបាយការណ៍ ដែលបាននិយាយថា ការជម្លៀស គឺផ្តោតលើស្រុកមួយចំនួននៃទីក្រុង Rafah ដោយការជម្លៀស នឹងត្រូវបានដឹកនាំទៅកាន់ទីក្រុងតង់ នៅក្បែរទីក្រុង Khan Younis និងទីក្រុង Al Muwassi។

តែយ៉ាងណាក្ដី ជាអ្វីដែលហាក់ដូចជាការចាប់ផ្តើមនៃការជម្លៀសជនស៊ីវិល មុនពេលការវាយលុកផ្លូវគោក យោធាអ៊ីស្រាអែលបានអំពាវនាវឲ្យប្រជាជនប៉ាឡេស្ទីន នៅតំបន់ភាគខាងកើតនៃទីក្រុង Rafah ផ្លាស់ទីទៅកាន់ «តំបន់មនុស្សធម៌» ក្បែរនោះ។

គួរបញ្ជាក់ថា ការវាយលុករយៈពេល ៧ខែរបស់ខ្លួនប្រឆាំងនឹងក្រុមហាម៉ាស អ៊ីស្រាអែលបាននិយាយថា ទីក្រុង Rafah ផ្តល់ជម្រកដល់ក្រុមសកម្មប្រយុទ្ធអ៊ីស្លាមប៉ាឡេស្ទីនរាប់ពាន់នាក់ ហើយថា ជ័យជម្នះ គឺមិនអាចទៅរួចទេ បើគ្មានការដណ្តើមយកទីក្រុងនេះ។

ប៉ុន្តែដោយមានជនភៀសខ្លួនប៉ាឡេស្ទីនជាង ១លាននាក់ បានជ្រកកោននៅទីក្រុង Rafah លទ្ធភាពនៃប្រតិបត្តិការដែលនាំឲ្យមានជនរងគ្រោះច្រើន ធ្វើឲ្យមហាអំណាចលោកខាងលិច និងប្រទេសអេហ្ស៊ីបដែលនៅជិតខាងព្រួយបារម្ភ៕