បេក្ខជនប្រធានាធិបតីនៃគណបក្សសាធារណរដ្ឋ លោក Donald Trump បានចោទប្រកាន់ប្រធានាធិបតីគូប្រជែងលោក Joe Biden របស់គណបក្សប្រជាធិបតេយ្យថា បានដំណើរការ «រដ្ឋបាល Gestapo» (រដ្ឋបាលដែលមានអាជ្ញាធររបស់ពួកណាស៊ី) ដោយការលើកឡើងនេះមាននៅក្នុងសុន្ទរកថាឯកជនមួយទៅកាន់ម្ចាស់ជំនួយ ដែលរូបលោកក៏បានវាយប្រហាររដ្ឋអាជ្ញាផងដែរ ពាក់ព័ន្ធនឹងការចោទប្រកាន់បទល្មើសព្រហ្មទណ្ឌលើរូបលោក។ នេះបើយោងតាមការខ្សែអាត់សំឡេងដែលត្រូវបានឮដោយប្រព័ន្ធផ្សព្វផ្សាយរបស់សហរដ្ឋអាមេរិក។

លោក Trump ដែលវោហាសាស្ត្រផ្ទាល់ខ្លួនរបស់លោកបាននាំឲ្យមានចោទប្រកាន់ពីការមាននិន្នាការហ្វាស៊ីសពីក្រុមការពារសិទ្ធិជនស៊ីវិល និងអ្នករិះគន់ផ្សេងទៀត បានធ្វើការប្រៀបធៀបរដ្ឋបាលរបស់លោក Biden ទៅនឹងនគរបាលណាស៊ីក្នុងរបបសង្គ្រាមលោកលើកទី២ របស់ប្រទេសអាល្លឺម៉ង់ កាលពីយប់ថ្ងៃសៅរ៍ (៤ ឧសភា) នៅឯរមណីយដ្ឋាន Mar-a-Lago របស់លោក ក្នុងរដ្ឋ Florida។

ហើយការអត្ថាធិប្បាយបែបនេះក៏បានកើតឡើងផងដែរបន្ទាប់ពីលោក Trump រិះគន់ពាក្យបណ្តឹងលើរូបលោកថា ការចោទប្រកាន់ជាច្រើនករណីមកលើរូបលោក គឺមានហេតុផលនយោបាយ។ លោកទើបតែបានបញ្ចប់ដំណើរការកាត់ក្ដីរយៈពេល ១១ថ្ងៃ ក្នុងសំណុំរឿងប្រាក់បំបិទមាត់ នៅទីក្រុងញូវយ៉ក ដែលក្នុងនោះលោកត្រូវបានចោទប្រកាន់ពីបទក្លែងបន្លំកំណត់ត្រាអាជីវកម្ម ដើម្បីបិទបាំងការបង់ប្រាក់ចំនួន ១៣០.០០០ដុល្លារ ដែលចំណាយទៅឲ្យតារាភាពយន្តអាសអាភាស។

បើយោងតាមខ្សែអាត់សំឡេងដែលត្រូវបានឮដោយសារព័ត៌មាន New York Times និង Washington Post បានឲ្យដឹងថា លោក Trump បាននិយាយថា៖ «មនុស្សទាំងនេះ កំពុងដំណើរការរដ្ឋបាល Gestapo។ ហើយវាជារឿងតែមួយគត់ដែលពួកគេមាន។ ហើយតាមគំនិតរបស់ពួកគេ វាជាវិធីតែមួយគត់ដែលពួកគេនឹងឈ្នះ តែវាពិតជាវិធីសម្លាប់ពួកគេវិញទេ។ វាមិនបានរំខានខ្ញុំនោះឡើយ»។

ក្រុមធ្វើយុទ្ធនាការរបស់លោក Trump មិនបានឆ្លើយតបទៅនឹងសំណើសុំការអត្ថាធិប្បាយលើការកត់សម្គាល់ ដែលបានរាយការណ៍នេះនោះទេ។ គួរបញ្ជាក់ថា លោក Trump ដែលកាន់តំណែងពីឆ្នាំ២០១៧ ដល់ឆ្នាំ២០២១ ប្រឈមនឹងបញ្ហាផ្លូវច្បាប់ជាច្រើននៅក្នុងសំណុំរឿងព្រហ្មទណ្ឌ និងរដ្ឋប្បវេណី ខណៈពេលដែលលោកស្វែងរកការដណ្តើមតំណែងប្រធានាធិបតីឡើងវិញ នៅក្នុងការបោះឆ្នោតថ្ងៃទី៥ ខែវិច្ឆិកា។ លោកបដិសេធពីការប្រព្រឹត្តខុសណាមួយ ក្នុងគ្រប់ករណីទាំងអស់៕