ប្រជាជនហុងគ្រីរាប់ពាន់នាក់ បាននាំគ្នាតវ៉ាប្រឆាំងនឹងនាយករដ្ឋមន្រ្តីជាតិនិយម លោក Viktor Orban នៅឯការជួបជុំមួយ កាលពីថ្ងៃអាទិត្យ (ទី៥ ខែឧសភា ) ដោយការតវ៉ានេះកើតមានឡើងក្នុងរយៈពេលប៉ុន្មានសប្តាហ៍នៅមុនការបោះឆ្នោតសភាអឺរ៉ុប និងការបោះឆ្នោតក្នុងតំបន់ ដែលនឹងប្រព្រឹត្តទៅនៅដើមខែមិថុនា។

លោក Peter Magyar ដែលជាអតីតអ្នកស៊ើបការណ៍របស់រដ្ឋាភិបាលត្រូវមើលឃើញដោយអ្នកសង្កេតការណ៍មួយចំនួនថា ជាការគំរាមកំហែងដ៏ធំដំបូងគេ ក្នុងរយៈពេលប៉ុន្មានឆ្នាំមកនេះចំពោះ លោក Orban បានរៀបចំការជួបជុំ ដែលមានមនុស្សប្រហែល ១0.000នាក់ នៅក្នុងទីក្រុង Debrecen ភាគខាងកើត ដែលជាបន្ទាយដ៏រឹងមាំរបស់គណបក្ស Fidesz ដែលកំពុងកាន់អំណាច។

បេក្ខជនគណបក្ស Fidesz បានគ្រប់គ្រងទីក្រុងនេះ តាំងពីចុងទសវត្សរ៍ឆ្នាំ១៩៩០ ដោយគណបក្សកាន់អំណាច បានឈ្នះប្រហែល ៦០ភាគរយនៃសន្លឹកឆ្នោតក្នុងការបោះឆ្នោតចុងក្រោយ បើធៀបនឹងប្រហែល១ភាគ៣ សម្រាប់គណបក្សប្រឆាំង។

ថ្លែងទៅកាន់អ្នកគាំទ្រដែលគ្រវីទង់ជាតិ លោក Magyar បានផ្តោតលើគោលនយោបាយស្នូលមួយរបស់ លោក Orban ដោយរិះគន់នូវអ្វីដែលលោកហៅថា កម្រិតទាបបំផុតនៃប្រាក់ឧបត្ថម្ភគាំទ្រដល់កុមារនៅក្នុងប្រទេសហុងគ្រី។ លោក Magyar បាននិយាយថា៖ «ប្រសិនបើអ្នកប្រាប់រឿងនេះនៅកន្លែងណាមួយក្នុងទ្វីបអឺរ៉ុប គ្មាននរណាម្នាក់ នឹងជឿអ្នកនោះទេ»។

តែលោក Orban អះអាងថា ក្នុងចំណោមបណ្តាប្រទេសសហភាពអឺរ៉ុប ហុងគ្រីកំពុងចំណាយចំណែកធំបំផុតនៃសេដ្ឋកិច្ចរបស់ខ្លួនលើការគាំទ្រគ្រួសារ។

ក្រុមអ្នកឃ្លាំមើលអន្តរជាតិនិយាយថា លោក Orban បានបញ្ជូនមូលនិធិសហភាពអឺរ៉ុបទៅឲ្យពាណិជ្ជករដែលជិតស្និទ្ធនឹងគណបក្ស Fidesz ដើម្បីពង្រឹងអំណាចខ្លួនឯង។ តែលោក Orban និយាយថា ប្រទេសហុងគ្រី មិនមានអំពើពុករលួយច្រើនជាងប្រទេសដទៃទៀតទេ៕