នៅថ្ងៃចន្ទនោះ រុស្ស៊ីបាននិយាយថា ខ្លួននឹងធ្វើសមយុទ្ធយោធាដែលនឹងរួមបញ្ចូលការប្រើប្រាស់អាវុធនុយក្លេអ៊ែរតាក់ទិច បន្ទាប់ពីអ្វីដែលក្រសួងការពារជាតិ បានអះអាងថា ជាការគំរាមកំហែងបង្កហេតុពីមន្ត្រីលោកខាងលិច។

ក្រសួងការពារជាតិ បានបញ្ជាក់ថា សមយុទ្ធនេះ ត្រូវបានបញ្ជាដោយប្រធានាធិបតី វ្ល៉ាឌីមៀ ពូទីន ហើយនឹងសាកល្បងការត្រៀមខ្លួនរបស់កងកម្លាំងនុយក្លេអ៊ែរដែលមិនមែនជាយុទ្ធសាស្ត្រ ដើម្បីបំពេញបេសកកម្មប្រយុទ្ធ។

ក្រសួងការពារជាតិ បានបន្តទៀតថា សមយុទ្ធយោធា នឹងរួមបញ្ចូលការអនុវត្តសម្រាប់ការរៀបចំ និងការដាក់ពង្រាយសម្រាប់ការប្រើប្រាស់អាវុធនុយក្លេអ៊ែរដែលមិនមែនជាយុទ្ធសាស្ត្រ។ ការបង្កើតមីស៊ីលនៅក្នុងតំបន់យោធាភាគខាងត្បូង និងកងកម្លាំងជើងទឹក នឹងចូលរួម។

ក្រសួងការពារជាតិ បាននិយាយថា៖«ក្នុងអំឡុងពេលសមយុទ្ធនេះ វិធានការជាបន្តបន្ទាប់ នឹងត្រូវបាន     បង្កើត ដើម្បីធ្វើការផ្សព្វផ្សាយពីការរៀបចំ និងការប្រើប្រាស់អាវុធនុយក្លេអ៊ែរដែលមិនមែនជាយុទ្ធសាស្ត្រ។

ប្រទេសរុស្ស៊ី មានឃ្លាំងអាវុធនុយក្លេអ៊ែរដ៏ធំបំផុតរបស់ពិភពលោក។

ក្រសួងការពារជាតិ ក៏បានសង្កត់ធ្ងន់ថា សមយុទ្ធនេះ មានគោលបំណងធានានូវបូរណភាពទឹកដី និងអធិបតេយ្យភាពរបស់រុស្ស៊ី«ជាការឆ្លើយតបទៅនឹងសេចក្តីថ្លែងការណ៍បង្កហេតុ និងការគំរាមកំហែងដោយមន្ត្រីលោកខាងលិចមួយចំនួនប្រឆាំងនឹងសហព័ន្ធរុស្ស៊ី»។