បាល់ទាត់៖ ខ្សែប្រយុទ្ធស្នូលរបស់ក្រុមបឹងកេត ចាន់ វឌ្ឍនាកា បានបង្កើនទំនុកចិត្តសម្រាប់ក្រុម និងធ្វើឲ្យអ្នកគាំទ្រខ្លួនពេញចិត្តកាន់តែខ្លាំង បន្ទាប់ពីរកបានគ្រាប់បាល់ៗជាប់គ្នានាប៉ុន្មានប្រកួតចុងក្រោយ ជាក់ស្ដែងកាលពីល្ងាចថ្ងៃទី០១ ខែសីហាម្សិលមិញ ម្ចាស់អាវលេខ១១ រូបនេះរកបាន ២គ្រាប់ម្នាក់ឯងជួយឲ្យក្រុមការពារតំណែងជើងឯក វាយបកយកឈ្នះក្រុមជើងឯករងព្រះខ័នរាជស្វាយរៀង ២-១ នៅកីឡដ្ឋានខេត្តស្វាយរៀង។
ជំនួបសប្ដាហ៍ទី១១ នៃលីគកំពូលកម្ពុជានេះ កីឡាករ Privat បានស៊ុតគ្រាប់បាល់នាំមុខឲ្យក្រុមព្រះខ័នរាជស្វាយរៀង ១គ្រាប់មុននៅនាទី១៥ មុនត្រូវបានកីឡាករ ចាន់ វឌ្ឍនាកា រកបានគ្រាប់តាមស្មើឲ្យក្រុមនាគខៀវវិញនៅនាទី៤៤។ ចូលវគ្គទី២ ក្រុមទាំងពីរបានវាយសម្រុកគ្នាកាន់តែខ្លាំង ហើយក៏ស្ទើរតែចែកគ្នា ១ពិន្ទុម្នាក់ផងដែរ បន្ទាប់ពីចំណាយពេលស្ទើរពេញ ៩០នាទីមិនមានក្រុមណាអាចបំប៉ោងសំណាញទីគ្នាបន្ថែមបាន។ ប៉ុន្ដែគួរឲ្យស្ដាយសម្រាប់ក្រុមម្ចាស់ផ្ទះ ពោលគឺនៅនាទីចុងក្រោយនៃការប្រកួត កីឡាករ ចាន់ វឌ្ឍនាកា បានប្រើជើងឆ្វេងស៊ុតបាល់ដោលចេញពីដៃអ្នកចាំទី អាំ សុវណ្ណារ៉ាត់ យ៉ាងល្អនៅនាទី៩០+៤ ដែលជាគ្រាប់បាល់ជ័យជម្នះរបស់ក្រុមបឹងកេតតែម្ដង។ នេះគឺជ័យជម្នះលើកទី៧ ជាប់គ្នារបស់ក្រុមជើងឯក ៤សម័យ បន្ទាប់ពីរងបរាជ័យ ៣ប្រកួតផ្ទួនៗកាលពីដើមរដូវកាល។
តាមរយៈលទ្ធផលនេះ បានធ្វើឲ្យក្រុមបឹងកេតហក់ទៅឈរលេខរៀងទី២ និងមាន ២១ពិន្ទុក្នុងដៃបណ្ដោះអាសន្ន ពោលគឺចាញ់ប្រៀបក្រុមកំពូលតារាងវិសាខាតែ ១ពិន្ទុប៉ុណ្ណោះ បន្ទាប់ពីឆ្លងកាត់ ១០ប្រកួតដូចគ្នាឈ្នះ៧ និងចាញ់៣។ រីឯក្រុមព្រះខ័នរាជស្វាយរៀងបានធ្លាក់មកឈរលេខ៤ ដោយរក្សា ១៩ពិន្ទុក្នុងដៃស្មើក្រុមណាហ្គាវើលដ៏ បន្ទាប់ពីប្រកួត ១០លើកឈ្នះ៦ ស្មើ១ និងចាញ់ ៣ប្រកួត៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
