ភ្នំពេញ៖ កាលពីថ្ងៃទី៤-៥ ខែឧសភា ឆ្នាំ២០២៤ និស្សិត និងសាស្រ្ដាចារ្យ នៃវិទ្យាស្ថានអាហ្គា​បានរៀបចំ​ដំណើរ​ទស្សន​កិច្ចសិក្សារមួយ ក្រោមប្រធានបទ «ស្វែងយល់អំពីការដំណើរ​ការ​ប្រព្រឹត្ត​ទៅ​ក្នុង​តំបន់សេដ្ឋកិច្ចពិសេសខេត្តព្រះសីហនុ» ក្រោមការ ដឹកនាំរបស់ លោកសាស្រ្តាចារ្យបណ្ឌិត អ៊ុយ សុផល។

លោកសាស្រ្តាចារ្យបណ្ឌិត អ៊ុយ សុផល មានប្រសាសន៍ថា ដើម្បីផ្សារភ្ជាប់ការសិក្សារបែបទ្រឹស្តី ទៅ​នឹងសកម្មភាពប្រតិបត្តិការសេដ្ឋកិច្ចជាក់ស្តែងនៅក្នុងព្រះរាជាណាចក្រកម្ពុជា វិទ្យាស្ថានអាហ្គា បាន​រៀបចំឱ្យមានដំណើរទស្សនៈកិច្ចសិក្សារមួយរបស់និស្សិតថ្នាក់បរិញ្ញាបត្រ ជាន់ខ្ពស់ជំនាន់ទី៥ ដែល​ហ្នឹងបញ្ចប់ការសិក្សារនៅបំណាច់ឆ្នាំ ២០២៤នេះ ទៅកាន់​តំបន់​សេដ្ឋកិច្ច​ពិសេស​ក្រុង​ព្រះសីហនុ ដើម្បីធ្វើការសិក្សារស្វែងយល់ អំពីដំណើរការ ការវិនិយោគ ការផលិតផលិតផល ការ​នាំ​ចេញ​ និងចង្វាក់ផលិតកម្មផ្សេងៗ។ បេសកកម្មដថ្លៃថ្លានេះ ក្នុងគោល​បំណង​ឲ្យ​និស្សិត​ថ្នាក់​បរិញ្ញា​បត្រ ជាន់ខ្ពស់អាច​ដក​ស្រង់​យកចំណេះដឹង​មួយ​ចំនួន​ដើម្បី​ជា​ទុន​ក្នុង​ការ​សរសេរ​និក្ខេប​បទ​បញ្ចប់​ការ​សិក្សាររបស់ខ្លួនក្នុងពេលខាងមុខ។

បើតាមលោកសាស្រ្តាចារ្យបណ្ឌិត អ៊ុយ សុផល ក្នុងដំណើរទស្សនៈកិច្ចសិក្សារនេះ ក្រុម​និស្សិត​ទាំង​អស់​បានទទួលការស្វាគមន៍ពីថ្នាក់ដឹកនាំនិងបុគ្គលិកនិយោជិកបស់ក្រុមហ៊ុន SOLAR LONG PV-TECH (CAMBODIA)CO, LTD. យ៉ាងកក់ក្តៅ និងបាន​ចង្អុល​បង្ហាញ​អំពី​ចង្វាក់​ផលិត​កម្ម​មួយ​ចំនួនដូចជា រោងចក្របានបង្កើតនៅថ្ងៃទី១ ខែកញ្ញា ឆ្នាំ២០២២ មានចំនួនបុគ្គលិកសរុប ១,៤០០ នាក់។ ក្នុងរោងចក្រទាំងមូលមានចង្វាក់ផលិតកម្មចំនួន ៤ ខ្សែ ក្នុង១ខ្សែផលិតបាន ៤,០០០ បន្ទះសូឡាក្នុង១ថ្ងៃជាផលិតផលសម្រេច។ ក្នុង​ចង្វាក់​ផលិតកម្ម​ទាំង​អស់​ចែក​ចេញ​ជា​៥​ដំណាក់​កាលទី១.ផលិតថ្មស៊ុលឡា - ទី២.ផ្ទាំងថ្ម និងកញ្ចក់ស៊ុលឡា ទី៣តភ្ជាប់ជាមួយចរន្ត ទី៤ ត្រួតពិនិត្យត្រូវត្រួតពិនិត្យ QC និងទី៥ ធ្វើការវេចខ្ចប់ និងដាក់ស៊ុម។ ក្រៅពីនេះ វត្ថុធាតុ​ដើម​ក្នុង​ការ​ផលិត គឺបាននាំចូលមកពីប្រទេសវៀតណាម ប្រទេសថៃ និងប្រទេសម៉ាលេស៊ី និងនាំ​ចេញ​ទៅ​កាន់ប្រទេសសហរដ្ឋអាមេរិក កាណាដា និងសហភាពអឺរ៉ុបមន្រ្តី​ប្រចាំការ​រដ្ឋបាល​តំបន់​សេដ្ឋកិច្ច​ពិសេសក្រុងព្រះសីហនុ លោក ញ៉ែម គឹមតាំ មានប្រសាសន៍ឱ្យដឹងថា តំបន់សេដ្ឋកិច្ច​ពិសេស​មាន​៥ស្ថាប័ន ដែលគ្រប់គ្រងច្រកចេញចូលតែ១ ក្នុងនោះមាន ក្រុមប្រឹក្សា​អភិវឌ្ឍន៍​កម្ពុជា​, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងពាណិជ្ជកម្ម, អគ្គនាយកដ្ឋានគយ និងរដ្ឋករ, រដ្ឋបាល​ខេត្តព្រះសីហនុ។ បច្ចុប្បន្ន តំបន់សេដ្ឋកិច្ចពិសេសមានក្រុមហ៊ុនកំពុងដំណើរការ ១០៤ ក្រុមហ៊ុន និងក្រុមហ៊ុនបានចុះបញ្ជីចំនួន ២៤៦ ប៉ុន្ដែក្នុង​នោះ​ក្រុមហ៊ុន​មួយ​ចំនួន​បាន​ផ្អាក​សកម្មភាព​ដោយសារ វិបត្តិសេដ្ឋកិច្ចពិភពលោក, ការប្រគួតប្រជែងរវាងមហាអំណាចសេដ្ឋកិច្ច, ជម្លោះ​ភូមិសាស្រ្តនយោបាយ, គ្មានការបញ្ជាទិញ។

លោក ញ៉ែម គឹមតាំ បានឱ្យដឹងថា បច្ចុប្បន្ននៅតំបន់សេដ្ឋកិច្ចពិសេសនេះ មានបុគ្គលិកកម្មករ បម្រើការងារជាង ២៥០០០នាក់។ ខណៈ​ក្នុង​នោះ​មា​ន​រោង​ចក្រ​ផលិត​នៅ​ផលិត​ផល​មួយ​ចំនួន​ដូច​ជា រោងចក្រក្តារបន្ទះ, រោងចក្រក្តាកុងផ្លាកកេ, រោងចក្រស៊ុលឡាឡុង, រោងចក្រកង់ឡាន, រោង​ចក្រសម្លៀកបំពាក់, រោងចក្រទុយយូជ័រ, រោងចក្រទុយយូដែក ហើយផលិតផលទាំងអស់នេះ នាំ​ចេញទៅកាន់ប្រទេសសហភាពអឺរ៉ុប, សហរដ្ឋអាមេរិក, និងប្រទេសអាស៊ាន។ លោក​បន្តថា ក្នុងតំបន់សេដ្ឋកិច្ចពិសេសនេះ ៩៥% វិនិយោគដោយ​ក្រុមហ៊ុន​បរទេស​មាន​ក្រុម​ហ៊ុន​ចិន, អាមេរិក បារាំង និងអៀឡង់។

សូមជម្រាបថា ដំណើរទស្សនៈកិច្ចសិក្សារនេះបានបញ្ចប់ដោយជោគជ័យ និងប្រកបដោយ​មោទនភាព​បំផុត ដែលក្រុមនិស្សិតទទួលបាន និងបានយល់ឃើញថា ប្រទេសកម្ពុជា​ពិត​ជា​មាន​មូល​ដ្ឋាន​សេដ្ឋកិច្ចទូលំទូលាយ និងរឹងមាំ ដែលអាចទាក់ទាញ​អ្នក​វិនិយោគ​ផ្ទាល់​ពី​បរទេស​កាន់​តែ​ច្រើន​ទៅៗ និងអាចចាប់យកឧស្សាហកម្មថ្មីៗ និងមានតម្លៃបន្ថែមកានតែខ្ពស់ ផ្អែកតាមការ​ដាក់​ចេញ​នូវ​យុទ្ធសាស្រ្តបញ្ចកោណ-ដំណាក់កាលទី១ ក្រោមការដឹកនាំ​ដ៏​ឈ្លាស​វៃរបស់​សម្តេច​មហា​បវរ​ធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា៕