ភ្នំពេញ៖ គិតមកដល់ពេលនេះ មជ្ឈមណ្ឌលការងារចល័តរបស់ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្ដុះបណ្ដាលវិជ្ជាជីវៈ នៅតែបន្តសកម្មភាពចុះផ្សព្វផ្សាយឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា ដើម្បីផ្តល់ព័ត៌មានអំពីទីផ្សារការងារ និងនាំយកឱកាសការងារឲ្យខិតជិតដល់យុវជន និងអ្នកស្វែងរកការងារ ដើម្បីបង្កើនលទ្ធភាព នៃការទទួលបានការងារកាន់តែឆាប់រហ័ស។
លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញរបស់ទីភ្នាក់ងារជាតិមុខរបរ និងការងារបានឲ្យព័ត៌មាន ប៊ីធីវី ដឹងនៅព្រឹកថ្ងៃទី៧ ខែឧសភានេះ ក្រៅពីការងារផ្សព្វផ្សាយព័ត៌មានការងារទីភ្នាក់ងារជាតិមុខរបរ និងការងារ ក៏នៅរក្សារៀបចំវេទិកាការងារ ពិព័រណ៍ការងារ និងកិច្ចសម្ភាសការងារជាប្រចាំដដែល ដើម្បីបង្កើតជាកន្លែងជួបជុំគ្នាដោយងាយស្រួលរវាងអ្នកស្វែងរកការងារធ្វើ និងនិយោជកដែលកំពុងត្រូវការជ្រើសរើសបុគ្គលិក អាចពិភាក្សា និងស្វែងយល់អំពីតម្រូវការជំនាញនៅក្នុងទីផ្សារការងារ។ លោកបានបន្តថា ជាមួយនឹងយុទ្ធនាការចុះផ្សព្វផ្សាយមួយរយៈចុងក្រោយនេះសង្កេតឃើញថា មានការយល់ដឹងជាច្រើនរបស់សិស្ស និស្សិតតាមគ្រឹះស្ថានឧត្តមសិក្សា ដែលពួកគាត់យល់ដឹងបន្ថែមអំពីក្រសួងការងារ និងបណ្តុះបណ្តាលវិជ្ជាជីវៈ ដែលមានទីភ្នាក់ងារជាតិមុខរបរ និងការងារ ក្នុងការជួយសម្របសម្រួលក្នុងការស្វែងរកការងារធ្វើជូនដល់ពួកគាត់។
លោកបន្តទៀតថា បន្ថែមពីនេះ នៅថ្ងៃទី៩ និង១០ ខែឧសភាខាងមុខនេះ NEA សហការជាមួយសហភាពសហព័ន្ធយុវជនកម្ពុជារាជធានីភ្នំពេញ នឹងរៀបចំពិព័រណ៍ការងារ និងមគ្គទេសន៍អាជីព ដោយមានការចូលរួមពីបណ្តាក្រុមហ៊ុន សហគ្រាសធំៗចំនួន២០ ក្នុងការជ្រើសរើសបុគ្គលិកសរុបចំនួនប្រមាណ ៥,៤០០នាក់។
យោងតាមកាលវិភាគរបស់ទីភ្នាក់ងារជាតិមុខរបរ និងការងារ ការផ្សព្វផ្សាយឱកាសការងារនៅតាមសាកលវិទ្យាល័យ និងគ្រឹះស្ថានសិក្សានានា នៅរាជធានីភ្នំពេញ សម្រាប់ថ្ងៃទី៧ ខែឧសភា ឆ្នាំ២០២៤នេះ រួមមាន៖ សាកលវិទ្យាល័យភូមិន្ទភ្នំពេញ , សាកលវិទ្យាល័យ អាស៊ី អឺរ៉ុប , វិទ្យាស្ថានជាតិសង្គមកិច្ច , សាកលវិទ្យាល័យធនធានមនុសស និងសាកលវិទ្យាល័យកម្ពុជា។ ដោយឡែក នៅថ្ងៃទី៨ ខែឧសភាស្អែកនេះ NEA នឹងចុះផ្សព្វផ្សាយបន្តនៅតាមសាកលវិទ្យាល័យ និងគ្រឹះស្ថានសិក្សាចំនួន៦ផ្សេងទៀត រួមមាន៖ នៅសាកលវិទ្យាល័យជាតិគ្រប់គ្រង, សាកលវិទ្យាល័យមេគង្គកម្ពុជា , សាកលវិទ្យាល័យវេស្ទើន , សាកលវិទ្យាល័យពុទ្ធិសាស្ត្រ , វិទ្យាស្ថានកសិកម្មព្រែកលៀប និងសាកលវិទ្យាល័យសេដ្ឋកិច្ច និងហិរញ្ញវត្ថុ៕
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
