អគ្គលេខាធិការដ្ឋានក្រុមប្រឹក្សាសកម្មភាពជនពិការ នៃក្រសួងសង្គមកិច្ច អតីតយុទ្ធជន និង​យុវនីតិ​សម្បទា ជាសេនាធិការឱ្យរាជរដ្ឋាភិបាល កំពុងបន្តជ្រើសរើសយុវជនមានពិការភាព ដើម្បី​ចូល​រួម​ប្រកួតប្រជែងផ្នែកព័ត៌មានវិទ្យា ជាលក្ខណៈអន្តរជាតិនៅប្រទេស ហ្វីលីពីន ចាប់ពីថ្ងៃទី១៤ ដល់​ថ្ងៃ​ទី១៩ ខែតុលា ឆ្នាំ២០២៤នេះ។

យុវជនមានពិការភាពអាចបន្តដាក់ពាក្យដោយភ្ជាប់ជាមួយលក្ខណ្ឌអាយុចាប់ពីចាប់ពី ១៤ទៅ ២៣​ឆ្នាំ ចេះភាសាអង់គ្លេសដែលអាចទំនាក់ទំនងបាន មានចំណេះដឹងកំព្យូទ័រ និងមាន​ស្មាត​ហ្វូន​ប្រើប្រាស់ មានលទ្ធភាពធ្វើលិខិតឆ្លងដែន ឬមានលិខិតឆ្លងដែនដែលអាចប្រើប្រាស់បាន និងមាន​ការ​អនុញ្ញាត​ពីគ្រួសារ អាណាព្យាបាល និងសាលារៀន។

សម្រាប់ការជ្រើស​រើសយុវជនមានពិការភាពចូលរួមប្រកួតប្រជែងក្នុង​កម្មវិធីជា​លក្ខ​ណៈ​អន្តរជាតិ​នេះ ​ឯកឧត្ដម អ៊ុង សម្បត្តិ អគ្គលេខាធិការស្តីទី នៃអគ្គលេខាធិការដ្ឋាន​ក្រុម​ប្រឹក្សា​សកម្មភាព​ជន​ពិការ លើកឡើងថា នេះជាកម្មវិធីដ៏មានសារៈសំខាន់មួយសម្រាប់ជនមានពិការភាព។ ឯកឧត្តម លើកឡើងថា យុវជនមានពិការភាណដែលបានដាក់ពាក្យ គឺ​នឹង​ទទួល​បាន​មេរៀន​ដើម្បី​សិក្សា​ភ្លាម​ៗ ទៅតាមវិញ្ញាសាប្រឡង។ ពួកគេត្រូវឆ្លងកាត់ការប្រឡងជម្រុះទាំងថ្នាក់ជាតិ ពាក់កណ្ដាល​ផ្ដាច់​ព័្រត្រ​ ក៏ដូចជាវគ្គផ្ដាច់ព្រ័ត្រ​ដែលកម្ពុជា នឹងជ្រើសយកយុវជនដែលមាន​ពិន្ទុខ្ពស់​ជាង​គេ​៤​រូប​សម្រាប់​ការ​ទៅ​ប្រឡង​នៅ​ប្រទេសហ្វីលីពីន ចាប់ពីថ្ងៃទី ១៤ ដល់ថ្ងៃទី ១៩ ខែតុលា ឆ្នាំ ២០២៤។

លោក លន អក្ខរា ជាអ្នកធ្លាប់ដឹកនាំយុវជនកម្ពុជាទៅចូលរួមប្រកួតនៅបរទេសនាពេលកន្លងទៅ បាន​ឱ្យ​ដឹង​ថា យុវជនមានពិការភាពកម្ពុជា ធ្លាប់បានចូលរួម​ប្រកួត​ប្រជែង​នឹង​ទទួល​បាន​មេដាយ​ចំនួន ២៨គ្រឿងផងដែរ។ ជាជោគជ័យធំបំផុត គឺនៅឆ្នាំ២០១៤ ដោយកម្ពុជា ទទួលបាន​មេដាយ​មាស ៧គ្រឿង ប្រាក់ ៧ និងមេដាយសំរឹទ្ធ ១គ្រឿង។ កម្ពុជានៅក្នុងឆ្នាំ ២០១៤ បាន​ក្លាយជា​ប្រទេសដែលដណ្ដើមបានដាយច្រើនជាងគេ ក្នុងចំណោមប្រទេសចូលរួមដទៃ។

លោក ធី ថុនា ជាអតីតបេក្ខជន ដែលទទួលបានមេដាយមាស និងប្រាក់​ក្នុង​ការ​ចូលរួម​ប្រកួត​កាល​ពីឆ្នាំ២០១៤ លើកឡើងដែរថា កម្មវិធីនេះជាកម្មវិធីប្រកួតប្រជែងដ៏មានសារៈសំខាន់។ កម្មវិធីនេះ បានបង្រៀន បានផ្ដល់បទពិសោធន៍ និងផ្លាស់ប្ដូរជីវិតលោកទាំងស្រុង ពីយុវជន​មាន​ពិការភាព​ធម្មតាម្នាក់ មកក្លាយជាមន្ត្រីក្របខណ្ឌក្នុងពេលបច្ចុប្បន្ន។ លោកលើកទឹកចិត្ត​ឱ្យ​យុវជន​មាន​ពិការភាព ត្រូវដាក់ពាក្យចូលរួមកម្មវិធីនេះ។

សូមជម្រាបថា ការប្រកួតប្រជែងជាសាកលផ្នែកព័ត៌មានវិទ្យា គឺប្រកួតលើ ៦ប្រភេទវិញ្ញាសា។ បេក្ខជន​នីមួយៗ មានសិទ្ធិចូលរួមប្រកួតទាំងគ្រប់ ៦វិញ្ញាសា។ វិញ្ញាសាទាំងនោះរួមមាន eTool Presentation eTool Spreadsheet eLife Map eContent eCreative Smart Car និង eCreative IoT៕ អត្ថបទ៖ គឹមហុក