បន្ទាយមានជ័យ៖ នាព្រឹកថ្ងៃទី៧ ខែឧសភា ឆ្នាំ២០២៤ ឯកឧត្ដម កែ គឹមយ៉ាន សមាជិក​គណៈអចិន្ត្រៃយ៍​គណៈកម្មាធិការកណ្ដាលគណបក្សប្រជាជនកម្ពុជា និងជាប្រធានក្រុម​ការងារ​គណបក្ស​ចុះមូលដ្ឋានខេត្តបន្ទាយមានជ័យ អមដោយក្រុមការងារ អាជ្ញាធរគ្រប់ថ្នាក់​អញ្ជើញ​សំណេះ​សំណាល​ជាមួយអង្គបោះឆ្នោត និង​បង្ហាញ​បេក្ខជន​ឈរ​ឈ្មោះ​បោះឆ្នោត​ជ្រើសរើស​ក្រុម​ប្រឹក្សា​ខេត្ត ក្រុង ស្រុក អាណត្តិទី៤ ឆ្នាំ២០២៤ នៅខេត្តខេត្តបន្ទាយមានជ័យ។

ក្រោយពីបានស្តាប់របាយការណ៍របស់គណបក្សខេត្ត ឯកឧត្តម កែ គឹមយ៉ាន បានសាទរ និង​ឯកភាព​លើ​របាយការណ៍ផែនការឆ្ពោះទៅកាន់ការចូលរួមបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤ ឆ្នាំ២០២៤ ។

ជាមួយនឹងការផ្តាំពាំផ្ញើសួរសុខទុក្ខ និងសេចក្តីនឹករលឹក ពរជ័យ ពីថ្នាក់ដឹកនាំ​ពិសេស​សម្ដេច​តេជោ ហ៊ុន សែន ក្នុងឱកាសនោះ ឯកឧត្តម កែ គឹមយ៉ាន អរគុណ កោតសរសើរ វាយ​តម្លៃ​ខ្ពស់​ចំពោះ​កិច្ច​ខិតខំប្រឹងប្រែង សាមគ្គីភាព ទទួលខុសត្រូវ របស់ក្រុម​ការងារ​គ្រប់​ថ្នាក់​ដែល​បាន​រួមគ្នា​អនុវត្ត​បាន​នូវរាល់ផែនការឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក និងសូមបង្ហាញបេក្ខជនឈរឈ្មោះបោះឆ្នោតជ្រើសរើសក្រុមប្រឹក្សាខេត្ត ក្រុង ស្រុក អាណត្តិទី៤ ឆ្នាំ២០២៤ សម្រាប់ខេត្តបន្ទាយមានជ័យ។

ក្នុងឱកាសនោះដែរ ឯកឧត្តម កែ គឹមយ៉ាន បានថ្លែងបញ្ជាក់បន្ថែមថា គណបក្សប្រជាជន​កម្ពុជា​ដឹកនាំ​ដោយ​សម្តេចតេជោ ហ៊ុន សែន និងរាជរដ្ឋាភិបាល​កម្ពុជា​ដឹកនាំ​ដោយ​សម្តេច​មហា​បវរធិបតី បាន​​និង​កំពុងដើរលើមាគ៌ាដ៏ត្រឹមត្រូវមានសន្តិភាព សន្តិសុខនិងការអភិវឌ្ឍពេញផ្ទៃប្រទេស ។

ក្នុងឱកាសនោះដែរ ថ្លែងក្នុងនាមប្រជាពលរដ្ឋទូទាំងខេត្តបន្ទាយមានជ័យ ឯកឧត្តម កែ គឹមយ៉ាន បានប្រកាសគាំទ្រគម្រោងកសាងព្រែកជីកហ្វូណនតេជោដែលមានប្រវែង ១៨០គីឡូម៉ែត្រ​ក្នុង​តម្លៃ​វិនិយោគ​ប្រមាណ១ពាន់៧រយលានដុល្លារអាមេរិក​ដែលផ្តល់​អត្ថប្រយោជន៍​ដ៏​មហា​សាល​សម្រាប់​កម្ពុជាគឺកាត់បន្ថយរយៈពេលចម្ងាយ តម្លៃដឹកជញ្ជូន បង្កើតតំបន់ពាណិជ្ជកម្ម ការអភិវឌ្ឍ​ផែរ​ណប​ថ្មីៗ ការអភិវឌ្ឍកសិកម្ម ប្រព័ន្ធធារាសាស្ត្រ និងជួយគាំ​​ទ្រ​ដល់​ការ​អភិវឌ្ឍ​ប៉ូល​សេដ្ឋកិច្ច​ទី៤​របស់​កម្ពុជា ក្នុងគោលដៅកម្ពុជាក្លាយជាប្រទេសចំណូលខ្ពស់ឆ្នាំ២០៥០។

ជាមួយគ្នានេះ ឯកឧត្តម កែ គឹមយ៉ាន បានណែនាំឱ្យគ្រប់​សមាសភាព​ពាក់ព័ន្ធ​ទាំងអស់​ត្រូវ​បន្ត​សាមគ្គីភាព ការទទួលខុសត្រូវ បន្តថែរក្សាសុខភាព ពិនិត្យឯកសារបោះឆ្នោត បន្តរួមគ្នា​អនុវ​ត្តផែន​ការឆ្ពោះទៅដណ្តើមបាននូវជោគជ័យក្នុងការបោះឆ្នោតជ្រើសរើសក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី៤ នៅថ្ងៃទី២៦ ខែឧសភា ឆ្នាំ២០២៤ ដើម្បីបន្តជំរុញ និងលើក​កម្ពស់​ដំណើរការនៃលទ្ធិប្រជាធិបតេយ្យសេរីពហុបក្សនៅកម្ពុជា និងចូលរួមទាំងអស់​គ្នា​អនុវត្ត​នូវ​យុទ្ធសាស្រ្ត​បញ្ចកោណដំណាក់កាលទី១ និងគោលនយោបាយភូមិ ឃុំ សង្កាត់ មានសុវត្ថិភាព​ដើម្បី​បន្ត​ពង្រឹងបាននូវសន្តិភាព ស្ថេរភាពនយោបាយ និងការអភិវឌ្ឍសង្គមលើគ្រប់វិស័យ នាំ​មក​វិបុល​សុខ វិបុលភាពជូនប្រជាពលរដ្ឋយើង៕​ អត្ថបទ​ រឿង​ ចន្ទ្រា