ភ្នំពេញ ៖ អភិបាលរាជធានីភ្នំពេញបាន ជំរុញជាថ្មីម្ដងទៀតឱ្យអាជ្ញាធរ និងសមត្ថកិច្ច ត្រូវបន្ត​តាមដាន​ត្រួតពិនិត្យក្លឹបកំសាន្ត និង ខារ៉ាអូខេ ដែលបានបើកលួចលាក់ ដោយមិនមានការកែប្រែ​ជា​ភោជណីយដ្ឋាន ដើម្បីបង្ការទប់ស្កាត់ការរីករាលដាល នៃជំងឺកូវីដ–១៩ ។

ជាថ្មីម្ដងទៀត ឯកឧត្ដម ឃួង ស្រេង អភិបាលនៃគណៈអភិបាលរាជធានីភ្នំពេញ​ បានជំរុញ​​ឱ្យអាជ្ញាធរមូលដ្ឋាប ​និងសមត្ថកិច្ចតាមបណ្ដាខណ្ឌទាំង១៤នៅក្នុងរាជធានីភ្នំពេញ ត្រូវ​បន្តការ​​តាមដាន និងត្រួតពិនិត្យទៅលើក្លឹបកំសាន្ត ​និងខារ៉ាអូខេ ដែលលួចលាក់ ដើម្បី​បង្ការ​ទប់ស្កាត់​នូវការរីករាលដាលនៃជំងឺកូវីដ–១៩ ខណៈដែលជំងឺនេះ​​ បាននឹងកំពុងរីករាលដាល​​នៅឡើយ បើទោះបីប្រទេសកម្ពុជាមិនមានអ្នកស្លាប់ដោយកូវីដ–១៩នេះក៏ដោយ ។ ឯកឧត្ដម ឃួង ស្រេង បានលើកឡើង នៅថ្ងៃទី០៥ ខែតុលា ឆ្នាំ២០២០ ក្នុងពិធីបើកសិក្ខាសាលាស្ដីពី ការគ្រប់គ្រង​ការរាតត្បាតនៃជំងឺកូវីដ–១៩ សម្រាប់អាជ្ញាធរមូលដ្ឋាន ខណ្ឌ សង្កាត់នៅរាជធានីភ្នំពេញ ក្រោមកិច្ចសហការក្នុងភាពជាដៃគូរ រវាងរដ្ឋបាលរាជធានីភ្នំពេញ និងសមាគមអន្តរជាតិនៃ​អភិបាលក្រុងប្រើប្រាស់ភាសាបារាំង ដែលហៅថា AIMF នៅសាលារាជធានីភ្នំពេញ។

ឯកឧត្ដម ឃួង ស្រេង មានប្រសាសន៍លើកឡើងថា ​យើងអាចភ្លេចជំងឺកូវីដ–១៩ តែជំងឺកូវីដ–១៩ មិន​ភ្លេចយើងទេ ។ ដូច្នេះទេ ក្នុងនាមអាជ្ញាធរខណ្ឌ សង្កាត់ត្រូវបន្តការផ្សព្វផ្សាយឱ្យប្រជាពលរដ្ឋ​​ចូលរួមបង្ការ និងទប់ស្កាត់នូវជំងឺ–១៩នេះ និងបន្តតាមដាននៅក្នុងមូលដ្ឋានរបស់ខ្លួន ពាក់ព័ន្ធ​ នឹងការលួចបើកក្លឹបកម្សាន្ត និងខារ៉ាអូខេ ដែលអាចធ្វើឱ្យរីករាលដាលនៃជម្ងឺកូវីដ–១៩នេះ ។

ឯកឧត្ដម ឃួង ស្រេង បានបញ្ជាក់ផងដែរថា ​ការបើកអង្គសិក្ខាសាលានេះឡើង គឺក្នុងគោលបំណង ដើម្បីបង្កើនប្រសិទ្ធភាពនៃការឆ្លើយតបលើកិច្ចការបង្ការ​ និងទប់ស្កាត់ការរាលដាលនៃវីរុស​ covid-19 នៅក្នុងខណ្ឌ សង្កាត់ និយាយដោយឡែក ​និងនិយាយជារួមដើម្បីឈានទៅពង្រឹង និង​ពង្រីក​កិច្ច​សហប្រតិបត្តិការកាន់តែស៊ីជម្រៅ និងទូលំទូលាយក្នុងភាពជាដៃគូររវាងសមាគម AIMF និងរដ្ឋបាលរាជធានីភ្នំពេញ ​តាមស្មារតីនៃឯកសារវិសោធនកម្មលេខ ២ ស្តីពីការត្រៀម​បង្ការចំពោះ​ស្ថានភាពបន្ទាន់ គំនិត​ផ្ដួចផ្តើម ដើម្បីសុខភាព និងអនាម័យល្អក្នុងទីក្រុង។ ​សម្រាប់ប្រទេសកម្ពុជា ក៏មិនអាច​គេចផុតពីការគំរាមកំហែងនៃជំងឺកូវីដ–១៩ ដូចគ្នានេះផងដែរ បើទោះបី ជាមកដល់​ពេលនេះ ប្រជាពលរដ្ឋខ្មែររួម និងជនបរទេសដែលកំពុងស្នាក់នៅក្នុងប្រទេសកម្ពុជា​មិនទាន់​មាននរណាម្នាក់រងគ្រោះរហូតដល់បាត់បង់ជីវិតនៅឡើយក្តី។ ប៉ុន្តែជាកត្តាសត្យានុម័ត បញ្ហានេះ​​ បានបង្កើតឱ្យមានផលប៉ះពាល់លើវិស័យជាច្រើន ពិសេសក្នុងវិស័យសេដ្ឋកិច្ច និង​សង្គមកិច្ច​​ជៀសមិនរួច។ ដូច្នេះ ការរៀបចំសិក្ខាសាលាក្នុងពេលនេះ គឺជាផ្នែកមួយនៃការអនុវត្តន៍​​គម្រោង​​ត្រៀមបង្ការ និងឆ្លើយតបចំពោះស្ថានភាពបន្ទាន់ ក្នុងនោះ រយៈពេលកន្លងមកក្រុមការងារអនុវត្ត​ គម្រោង​​នៃ​សមាគម AIMF សហការជាមួយ​ នឹងមន្ទីរសុខាភិបាលរាជធានីភ្នំពេញ​បើក​វគ្គបណ្ដុះបណ្ដាល​​ ចំនួន០៩លើករួចមកហើយ ​ដោយផ្ដោតសំខាន់លើស្ថានភាពទូទៅនៃជំងឺកូវី–១៩ វិធានការការពារការចម្លងរោគ ​ការប្រើប្រាស់សំភារៈការពារខ្លួន ​ការប្រមូលវេចខ្ចប់ និងការដឹកជញ្ជូន​សំណាករបស់អ្នកជម្ងឺកូវីដ–១៩ ជាដើម។

គួរបញ្ជាក់ថា អង្គសិក្ខាសាលានេះនឹងធ្វើឡើងក្នុងរយៈពេលពីរថ្ងៃពេញ ហើយនៅក្នុងពិធីនោះ រដ្ឋបាលរាជធានីភ្នំពេញក៏បានប្រគល់បរិក្ខាពេទ្យសម្រាប់ការពារ ​និងទប់ស្កាត់ជំងឺកូវីដ–១៩ ជូន​ដល់ក្រុមឆ្លើយតបបន្ទាន់នៃមន្ទីរសុខាភិបាលរាជធានីភ្នំពេញផងដែរ ដើម្បីប្រើប្រាស់​​បន្តគាំទ្រ​ក្នុងយុទ្ធនាការប្រយុទ្ធប្រឆាំងនឹងការរីករាលដាលជំងឺកូវីដ–១៩ ​នៅរាជធានីភ្នំពេញ៕

អត្ថបទ ៖ ប្រាក់ វ៉ាន់ដា