មនុស្សជាង ៥០០នាក់ ត្រូវបានបញ្ជូនទៅកាន់មន្ទីរពេទ្យ ដោយសង្ស័យថា ពុលអាហារ បន្ទាប់ពីបានបរិភោគនំប៉័ងប៉ាតេបែបសាន់វ៉ិចពីហាងមួយ នៅភាគខាងត្បូងប្រទេសវៀតណាម។ ក្នុងចំណោមអ្នករងគ្រោះទាំងនោះ មនុស្ស ១២នាក់ ក្នុងនោះរួមទាំងក្មេងប្រុស ២នាក់ ដែលមានអាយុចន្លោះពី ៦ ទៅ ៧ឆ្នាំស្ថិត ក្នុងស្ថានភាពធ្ងន់ធ្ងរ។

ហាងនំប៉័ងដែលមានមូលដ្ឋាននៅខេត្ត Dong Nai ត្រូវបានបិទជាបណ្ដោះអាសន្ន។ គេជឿថា នំប៉័ងដាក់សាច់នេះប្រហែលជាផ្អូមដោយសាររលកកម្ដៅបច្ចុប្បន្ន។ ការចុះត្រួតពិនិត្យដំបូងលើហាងនំប៉័ងនេះបានបង្ហាញថា ហាងនេះមិនបានបំពេញតាមស្តង់ដារសុវត្ថិភាពចំណីអាហារនោះទេ។

កាលពីថ្ងៃចន្ទ (ទី៦ ខែឧសភា) អាជ្ញាធរក្រុង Long Khanh បានបញ្ជាក់ថា មនុស្សយ៉ាងហោចណាស់ ៥៦០នាក់ បានធ្លាក់ខ្លួនឈឺ បន្ទាប់ពីទទួលទាននំប៉័ងដាក់សាច់ពីហាងនំប៉័ងឈកនោះ Bang ក្នុងក្រុង Long Khanh កាលពីថ្ងៃទី៣០ ខែមេសា។ ហើយអជ្ញាធរក៏បានបញ្ជាក់បន្ថែមផងដែរថា មនុស្ស ២០០នាក់ ត្រូវបានអនុញ្ញាតឲ្យចាកចេញពីមន្ទីរពេទ្យ។

គួរបញ្ជាក់ថា យោងតាមអាជ្ញាធរក្នុងតំបន់ បានឲ្យដឹងថា ហាងនំប៉័ងដែលមានមូលដ្ឋានលើផ្លូវ Tran Quang Dieu នេះ លក់នំប៉័ងដាក់សាច់បែបសាំងវិចនេះប្រហែល ១.១០០ដើម ក្នុងមួយថ្ងៃ។

របាយការណ៍របស់មន្ទីរពេទ្យក្នុងតំបន់ បានឲ្យដឹងថា ចំនួនករណីសង្ស័យពាក់ព័ន្ធនឹងការពុលអាហារនេះ បានកើនឡើងជាលំដាប់រៀងរាល់ថ្ងៃ។ រោគសញ្ញារួមមាន រាករូស ក្អួត ក្តៅខ្លួន និងឈឺពោះធ្ងន់ធ្ងរ។

យោងតាមសារព័ត៌មាន Tuoi Tre News បានឲ្យដឹងថា បុគ្គលិកសុខាភិបាលក្នុងតំបន់ បានយកគំរូនំប៉័ងដាក់សាច់នេះទៅកាន់មន្ទីរពិសោធន៍ ដើម្បីធ្វើតេស្តបន្ថែម។ ចំណែកមន្ត្រីនគរបាលប្រាប់ថា ពួកគេបានបើកការស៊ើបអង្កេតលើមូលហេតុនៃការពុលអាហារនេះ៕