ប្រធានាធិបតី វ្ល៉ាឌីមៀរ ពូទីន នៅថ្ងៃអង្គារ (ទី៧ ខែឧសភា) បានស្បថចូលកាន់តំណែងអាណត្តិថ្មីរយៈពេល ៦ឆ្នាំ នៅឯពិធីក្នុងវិមានក្រឹមឡាំង ដែលពិធីនេះត្រូវបានធ្វើពហិការដោយសហរដ្ឋអាមេរិក និងប្រទេសលោកខាងលិចមួយចំនួនផ្សេងទៀត ដោយសារតែសង្គ្រាមរបស់រុស្ស៊ី នៅអ៊ុយក្រែន។
គួរបញ្ជាក់ថា លោក ពូទីន ដែលកាន់តំណែងជាប្រធានាធិបតី ឬនាយករដ្ឋមន្ត្រីតាំងពីឆ្នាំ១៩៩៩ មកនោះ ចាប់ផ្តើមអាណត្តិថ្មីរបស់លោក ក្នុងរយៈពេលជាង ២ឆ្នាំបន្ទាប់ពីលោកបានបញ្ជូនទាហានរាប់ម៉ឺននាក់ចូលទៅលុកលុយអ៊ុយក្រែន ជាកន្លែងដែលកងកម្លាំងរុស្ស៊ីបានចាប់ផ្ដើមគ្រប់គ្រងស្ថានការណ៍ឡើងវិញ បន្ទាប់ពីជួបបញ្ហាជាបន្តបន្ទាប់ និងកំពុងព្យាយាមរុលទៅមុខបន្ថែមទៀត នៅភាគខាងកើត។
នៅវ័យ ៧១ឆ្នាំ លោក ពូទីន មានឥទ្ធិពលយ៉ាងធំធេងលើទិដ្ឋភាពនយោបាយក្នុងស្រុក។ នៅលើឆាកអន្តរជាតិ រូបលោកត្រូវជាប់នៅក្នុងការប្រឈមមុខដាក់គ្នាជាមួយបណ្តាប្រទេសលោកខាងលិច ដែលលោកបានចោទប្រកាន់ថា បានប្រើប្រាស់អ៊ុយក្រែនជាឈ្នាន់ ដើម្បីព្យាយាមកម្ចាត់ និងបំផ្លាញប្រទេសរុស្ស៊ី។
នៅមុនពិធីសម្បថនេះ លោក Sergei Chemezov ដែលជាសម្ព័ន្ធមិត្តជិតស្និទ្ធរបស់លោក ពូទីន បានប្រាប់សារព័ត៌មាន Reuters ថា៖ «សម្រាប់ប្រទេសរុស្ស៊ី នេះគឺជាការបន្តផ្លូវធ្វើដំណើររបស់យើង។ នេះគឺជាស្ថិរភាព។ សម្រាប់រឿងនេះ អ្នកអាចសួរប្រជាពលរដ្ឋណាម្នាក់នៅតាមដងផ្លូវបាន»។
សូមបញ្ជាក់បន្ថែមថា លោក ពូទីន ក្នុងខែមីនា បានទទួលជ័យជម្នះក្នុងសំឡេងយ៉ាងច្រើនលើសលប់ នៅក្នុងការបោះឆ្នោតដែលគ្រប់គ្រងយ៉ាងតឹងរ៉ឹង ដែលបេក្ខជនប្រឆាំងសង្គ្រាម ២រូប ត្រូវបានរារាំងមិនឲ្យចូលរួមដោយហេតុផលបច្ចេកទេស។
យ៉ាងណាក្ដី សហរដ្ឋអាមេរិក និងប្រទេសលោកខាងលិចផ្សេងទៀត មិនបានចូលរួមក្នុងពិធីនេះនោះទេ។ ហើយប្រទេសអង់គ្លេស កាណាដា និងបណ្តាប្រទេសសហភាពអឺរ៉ុបភាគច្រើន ក៏បានសម្រេចចិត្តធ្វើពហិការមិនចូលរួមពិធីស្បថចូលកាន់តំណែងនេះដែរ ប៉ុន្តែបារាំងបាននិយាយថា ខ្លួននឹងបញ្ជូនឯកអគ្គរដ្ឋទូតរបស់ខ្លួនទៅ។ ចំណែកប្រទេសអ៊ុយក្រែនបាននិយាយថា ព្រឹត្តិការណ៍នេះបានស្វែងរកការបង្កើតនូវ «ការបំភ័ន្តភាពស្របច្បាប់ ដើម្បីបន្តកាន់អំណាចស្ទើរពេញមួយជីវិតរបស់បុគ្គលដែលបានប្រែក្លាយសហព័ន្ធរុស្ស៊ីទៅជារដ្ឋឈ្លានពាន និងរបបកាន់អំណាចទៅជារបបផ្តាច់ការ»៕