មូលនិធិសង្គ្រោះកុមារអន្តរជាតិរបស់អង្គការសហប្រជាជាតិ (UNICEF) បានព្រមានកាលពីថ្ងៃចន្ទថា ការឡោមព័ទ្ធដោយយោធា និងការវាយលុកជើងគោកនៅទីក្រុងរ៉ាហ្វា ( Rafah) នឹងបង្ក «ហានិភ័យដ៏មហន្តរាយ»ដល់កុមារចំនួន ៦០០.000 នាក់ ដែលកំពុងស្នាក់នៅទីនោះ។

នាយកប្រតិបត្តិអង្គការ UNICEF លោក ស្រី Catherine Russell បាននិយាយថា៖«បច្ចុប្បន្ន ទីក្រុងរ៉ាហ្វា គឺជាទីក្រុងរបស់កុមារ ដែលគ្មានកន្លែងមានសុវត្ថិភាពនៅក្នុងតំបន់ហ្កាហ្សាទេ ប្រសិនបើប្រតិបត្តិការយោធាទ្រង់ទ្រាយធំ ចាប់ផ្តើម មិនត្រឹមតែកុមារនឹងប្រឈមមុខនឹងហានិភ័យពីអំពើហិង្សាប៉ុណ្ណោះទេ ថែមទាំងមកពីភាពចលាចល និងការភ័យស្លន់ស្លោផងដែរ ហើយនៅពេលនោះ រាងកាយរបស់ពួកគេ ហើយស្ថានភាពផ្លូវចិត្ត បានចុះខ្សោយរួចទៅហើយ»។

កុមារជាង ១៤.000 នាក់ ត្រូវបានគេរាយការណ៍ថា បានស្លាប់នៅក្នុងជម្លោះនាពេលបច្ចុប្បន្ននេះ នេះបើយោងតាមការប៉ាន់ស្មានចុងក្រោយដោយក្រសួងសុខាភិបាលប៉ាឡេស្ទីន។

អង្គការ UNICEF បាននិយាយថា កុមាររាប់សែននាក់នៅទីក្រុងរ៉ាហ្វា ត្រូវបានគេប៉ាន់ប្រមាណថា មានពិការភាព ស្ថានភាពសុខភាព ឬភាពងាយរងគ្រោះផ្សេងទៀត ដែលធ្វើឲ្យពួកគេស្ថិតក្នុងហានិភ័យកាន់តែខ្លាំងពីប្រតិបត្តិការយោធាដែលកំពុងកើនឡើងនៅក្នុងទីក្រុងនេះ។

លោកស្រី Russell បាននិយាយថា៖«កុមាររាប់សែននាក់ដែលប្រមូលផ្តុំគ្នានៅក្នុងទីក្រុងរ៉ាហ្វា បានរងរបួស ឈឺ ខ្វះអាហារូបត្ថម្ភ បាត់បង់ស្មារតី ឬរស់នៅជាមួយភាពពិការ»។

លោកស្រី បានបន្ថែមថា មនុស្សជាច្រើន ត្រូវបានផ្លាស់ប្តូរទីលំនៅច្រើនដង និងបាត់បង់ផ្ទះសម្បែង ឪពុកម្តាយ និងមនុស្សជាទីស្រឡាញ់។