អធិការបតីអាល្លឺម៉ង់ លោក អូឡាហ្វ សូល ( Olaf Scholz) បានសន្យាការពារសម្ព័ន្ធមិត្តណាតូបាល់ទិកចំនួនបីរបស់អាល្លឺម៉ង់ក្នុងករណីមានការវាយប្រហាររបស់រុស្ស៊ី ហើយនឹងបញ្ចប់ការបង្កើតកង ពលតូចអចិន្ត្រៃយ៍ នៅក្នុងប្រទេសលីទុយអានី នៅចុងឆ្នាំ ២០២៧។

លោក សូល បាននិយាយកាលពីថ្ងៃចន្ទបន្ទាប់ពីកិច្ចពិភាក្សានៅទីក្រុងរីហ្គាជាមួយសមភាគីរបស់លោក មកពីប្រទេសឡាតវី អេស្តូនី និងលីទុយអានីថា៖«អាល្លឺម៉ង់ប្តេជ្ញាការពារគ្រប់មិល្លីម៉ែត្រនៃទឹកដីសម្ព័ន្ធមិត្ត» ដោយបានបញ្ជាក់ថា សន្តិសុខរបស់ប្រទេសទាំងបី ដែលជាប់ព្រំដែនជាមួយប្រទេសរុស្ស៊ី និងបេឡារុសក៏ជាគន្លឹះសម្រាប់សុវត្ថិភាពរបស់ប្រទេសអាល្លឺម៉ង់ផងដែរ។

នៅក្នុងសន្និសីទសារព័ត៌មានរួមគ្នាជាមួយលោកស្រី Evika Silina នាយករដ្ឋមន្ត្រីនៃប្រទេសឡាតវី លោកស្រី Kaja Kallas របស់ប្រទេសអេស្តូនី និង លោកស្រី Ingrida Simonyte របស់ប្រទេសលីទុយអានី លោក សូល បានបន្ថែមថា៖«ហើយខ្ញុំក៏ចង់និយាយនៅទីនេះដែរថា ការវាយប្រហារមកលើអ្នក ក៏នឹងជាការវាយប្រហារមកលើយើងទាំងអស់គ្នាផងដែរ»។

បញ្ជាការបឋមនៃទាហានអាល្លឺម៉ង់ ២០នាក់ បានមកដល់ប្រទេសលីទុយអានី ក្នុងខែមេសា ហើយគ្រោងនឹងពង្រីកដល់បុគ្គលិកប្រហែល ១៥០នាក់ នៅចុងឆ្នាំនេះ។

ទាហាន ៥.០០០ នាក់ នឹងត្រូវឈរជើងជាអចិន្ត្រៃយ៍នៅឯមូលដ្ឋានយោធា Rukla នៅជិតមូលដ្ឋាន Kaunas នៅភាគកណ្តាលនៃប្រទេសលីទុយអានី និងមូលដ្ឋានយោធា Rudninkai នៅជិតរដ្ឋធានីវីលនីញូ (Vilnius) និងព្រំដែនជាមួយប្រទេសបេឡារុស។