ការវាយប្រហារក្នុងមន្ទីរពេទ្យមួយ នៅភាគនិរតីនៃប្រទេសចិន នាថ្ងៃអង្គារ (ទី៧ ខែឧសភា) នេះ បានបណ្ដាលឲ្យមនុស្សស្លាប់ ឬរងរបួសជាង ១០នាក់។ នេះបើយោងតាមប្រព័ន្ធផ្សព្វផ្សាយរដ្ឋ ដែលមិនបានបញ្ជាក់អំពីលក្ខណៈនៃការវាយប្រហារនោះ។
ទីភ្នាក់ងារព័ត៌មានរដ្ឋ Xinhua បានឲ្យដឹងថា៖ «ឧបទ្ទវហេតុនេះបានកើតឡើង នៅមន្ទីរពេទ្យមូលដ្ឋានមួយ ហើយគិតត្រឹមម៉ោង ១៣:២០នាទី ម៉ោងក្នុងស្រុក (ត្រូវនឹងម៉ោង ៥:២០នាទី) មនុស្សជាង ១០នាក់បានរងរបួស ឬស្លាប់»។
ទីភ្នាក់ងារសារព័ត៌មាននេះ បានបន្ថែមថា ការវាយប្រហារនេះបានកើតឡើងនៅក្នុងតំបន់ Zhenxiong ក្នុងខេត្ត Yunnan ភាគនិរតី ហើយអាជ្ញាធរកំពុងស៊ើបអង្កេតលើករណីនេះ។
រូបភាពដែលចុះផ្សាយដោយសារព័ត៌មានឌីជីថលដែលគ្រប់គ្រងដោយរដ្ឋ «The Paper» ហាក់ដូចជាបានបង្ហាញឲ្យឃើញបុរសម្នាក់កំពុងភ្ជង់ចុងកាំបិតតម្រង់ទៅកាន់បុរសម្នាក់ទៀតដែលកាន់ដំបង នៅក្នុងបន្ទប់រង់ចាំរបស់មន្ទីរពេទ្យ ក៏ដូចជាមន្រ្តីនគរបាលទៅដល់កន្លែងកើតហេតុ។
អ្នកស្រុកម្នាក់បានប្រាប់សារព័ត៌មាន The Paper ថា៖ «វាបានកើតឡើងប្រហែលម៉ោង ១១ព្រឹក។ វានៅតែមានភាពច្របូកច្របល់បន្តិច។ ពួកគេនៅតែកំណត់តួលេខ»។
គួរបញ្ជាក់ថា ឧក្រិដ្ឋកម្មហិង្សាទ្រង់ទ្រាយធំ គឺកម្រកើតមានណាស់នៅប្រទេសចិន ដោយប្រទេសនេះហាមប្រាមពលរដ្ឋយ៉ាងតឹងរ៉ឹងមិនឲ្យកាន់កាប់អាវុធ ប៉ុន្តែការចាក់សម្លាប់បានកើតឡើងក្នុងរយៈពេលប៉ុន្មានឆ្នាំចុងក្រោយនេះ។
កាលពីខែសីហាឆ្នាំមុន នៅខេត្ត Yunnan មនុស្ស ២នាក់ស្លាប់ ហើយ ៧នាក់ផ្សេងទៀតបានរងរបួស បន្ទាប់ពីបុរសម្នាក់ដែលមានប្រវត្តិជំងឺផ្លូវចិត្ត បានវាយប្រហារមនុស្សម្នា ដោយចាក់នឹងកាំបិត។ កាលពីខែមុន មនុស្ស ៦នាក់បានបាត់បង់ជីវិត និងម្នាក់ទៀតរងរបួស ក្នុងហេតុការណ៍ចាក់នឹងកាំបិត នៅសាលាមត្តេយ្យមួយ ក្នុងខេត្ត Guangdong ភាគខាងត្បូងប្រទេសចិន។ ហើយកាលបីខែសីហា ឆ្នាំ២០២២ មនុស្ស ៣នាក់ត្រូវបានសម្លាប់ និង ៦នាក់រងរបួស នៅក្នុងការវាយប្រហារដោយកាំបិត នៅសាលាមត្តេយ្យមួយ ក្នុងខេត្ត Jiangxi ភាគអាគ្នេយ៍ប្រទេសចិន៕