ប្រទេសចិន នៅថ្ងៃអង្គារ (ទី៧ ខែឧសភា) នេះ បានជំរុញឲ្យអ៊ីស្រាអែល «បញ្ឈប់ការវាយប្រហារលើទីក្រុង Rafah» បន្ទាប់ពីកងទ័ពអ៊ីស្រាអែល បានប្រាប់ថា ខ្លួនបាន «គ្រប់គ្រងប្រតិបត្តិការ» របស់ភាគីប៉ាឡេស្ទីន នៅតំបន់ព្រំដែន Rafah ដែលជាផ្លូវឆ្លងកាត់រវាងតំបន់ហ្កាហ្សា និងប្រទេសអេហ្ស៊ីប។
អ្នកនាំពាក្យក្រសួងការបរទេសចិន លោក Lin Jian បាននិយាយថា៖ «ប្រទេសចិនសូមអំពាវនាវយ៉ាងទទូចឲ្យអ៊ីស្រាអែលស្ដាប់តាមការទាមទារដ៏លើសលប់ពីសហគមន៍អន្តរជាតិ បញ្ឈប់ការវាយប្រហារលើទីក្រុង Rafah និងធ្វើអ្វីៗគ្រប់យ៉ាងដែលអាចធ្វើទៅបាន ដើម្បីជៀសវាងការកើតគ្រោះមហន្តរាយមនុស្សធម៌ធ្ងន់ធ្ងរបន្ថែមទៀត នៅក្នុងតំបន់ហ្កាហ្សាស្ទ្រីប»។
អ៊ីស្រាអែលបានធ្វើការវាយប្រហារលើទីក្រុង Rafah របស់តំបន់ហ្កាហ្សា ពេញមួយយប់ ខណៈដែលប្រទេសនេះបានព្យាយាមដាក់ «សម្ពាធ» លើក្រុមហាម៉ាស មុនពេលមានកិច្ចពិភាក្សា នៅប្រទេសអេហ្ស៊ីបនាថ្ងៃទី៧ ខែឧសភានេះ ពោលគឺជាការចរចាដែលត្រូវបានធ្វើឡើងក្នុងគោលបំណងដើម្បីធានាបាននូវសំណើបទឈប់បាញ់ដែលគាំទ្រដោយពួកសកម្មប្រយុទ្ធ។
បន្ទាប់ពីបានប្តេជ្ញាជាច្រើនសប្តាហ៍ ដើម្បីរុលចូលទៅក្នុងទីក្រុងព្រំដែនភាគខាងត្បូង អ៊ីស្រាអែល កាលពីថ្ងៃចន្ទ (ទី៦ ខែឧសភា) បានអំពាវនាវឲ្យប្រជាជនប៉ាឡេស្ទីន នៅភាគខាងកើតទីក្រុង Rafah ចាកចេញទៅកាន់ «តំបន់មនុស្សធម៌ដែលត្រូវបានពង្រីកយ៉ាងធំធេង» មុនពេលមានការលុកលុយផ្លូវគោក។
លោក Lin បាននិយាយថា៖ «សង្គ្រាម និងអំពើហិង្សាមិនអាចដោះស្រាយបញ្ហាជាមូលដ្ឋានបានទេ ហើយមិនអាចនាំមកនូវសន្តិសុខពិតប្រាកដបានទេ»៕