ទីក្រុងតៃប៉ិបានឲ្យដឹងថា នាវាឆ្មាំល្បាតសមុទ្រចិនចំនួន ៤គ្រឿង បានធ្វើដំណើរឆ្លងចូលមួយភ្លែតក្នុងដែនទឹក «ហាមឃាត់» របស់កោះតៃវ៉ាន់ ដោយជំរុញឲ្យទីក្រុងប៉េកាំងបញ្ឈប់សកម្មភាពដែលបង្កគ្រោះថ្នាក់ដល់សុវត្ថិភាពនាវាចរណ៍។
គួរបញ្ជាក់ថា ប្រទេសចិនចាត់ទុកកោះតៃវ៉ាន់ជាខេត្តផ្ដាច់ខ្លួនមួយដែលត្រូវតែបង្រួបបង្រួមជាមួយខ្លួនឡើងវិញ ដោយប្រើកម្លាំងប្រសិនបើចាំបាច់។ តែរដ្ឋបាលកោះតៃវ៉ាន់ ជំទាស់យ៉ាងដាច់អហង្ការ ចំពោះការអះអាងរបស់ចិន។
នៅយប់ថ្ងៃចន្ទ (ទី៦ ខែឧសភា) ឆ្មាំល្បាតសមុទ្ររបស់កោះតៃវ៉ាន់បានឲ្យដឹងនៅក្នុងសេចក្តីថ្លែងការណ៍មួយថា នៅម៉ោងប្រហែល ៣ និង ៣០នាទីរសៀល ថ្ងៃទី ៦ ឧសភានេះ នាវាចិនបានឆ្លងចូលដែនទឹកភាគខាងត្បូងនៃកោះដាច់ស្រយាលរបស់តៃវ៉ាន់ គឺកោះ Kinmen ដែលមានចម្ងាយ ៥គីឡូម៉ែត្រពីទីក្រុង Xiamen របស់ចិន។
តែយ៉ាងណាក្ដី ទីភ្នាក់ងារនេះបានបញ្ជាក់បន្ថែមថា នាវាទាំងនោះ «បានបើកចេញពីដែនទឹកហាមឃាត់ និងកំណត់របស់យើង» ប្រហែល ១ម៉ោងក្រោយមក ដោយបានជំរុញឲ្យទីក្រុងប៉េកាំងបញ្ឈប់ជាបន្ទាន់នូវ «ឥរិយាបថដែលបង្កគ្រោះថ្នាក់ដល់សុវត្ថិភាពនាវាចរណ៍នេះ»។
គួរបញ្ជាក់ដែរថា ក្នុងប៉ុន្មានឆ្នាំថ្មីៗនេះ ប្រទេសចិនបានបង្កើនប្រតិបត្តិការយន្តហោះ និងនាវាកងទ័ពជើងទឹក នៅជុំវិញកោះនេះ។ ហើយហេតុការណ៍នៅថ្ងៃទី៦ ខែឧសភានេះ កើតមានឡើងក្នុងរយៈពេល ២សប្តាហ៍ មុនពិធីប្រគល់តំណែង ២០ ឧសភាដល់មេដឹកនាំជាប់ឆ្នោតរបស់កោះតៃវ៉ាន់ គឺលោក Lai Ching-te៕