មេដឹកនាំប្រឆាំងរុស្ស៊ីដែលរស់នៅនិរទេសខ្លួន គឺលោកស្រី Yulia Navalnaya នៅថ្ងៃអង្គារ (៧ ឧសភា) នេះ បានជំរុញអ្នកគាំទ្រឲ្យបន្តប្រយុទ្ធប្រឆាំងនឹងប្រធានាធិបតីលោក Vladimir Putin ដោយពណ៌នារូបលោក នៅថ្ងៃស្បថឡើងកាន់តំណែងជាថ្មីរបស់លោកថា ជាជនប្រើអំណាចសម្លាប់មនុស្ស។
តាមរយៈវីដេអូមួយដែលបានផ្សព្វផ្សាយនៅលើឆាណែល YouTube ពោលគឺភ្លាមៗនៅមុនពេលមានពិធីរបស់វិមានក្រឹមឡាំង ដែលលោក Putin ស្បថចូលកាន់តំណែងសម្រាប់អាណត្តិថ្មីរយៈពេល ៦ឆ្នាំ លោកស្រី Navalnaya បាននិយាយថា៖ «ប្រទេសរបស់យើងបច្ចុប្បន្ន កំពុងត្រូវបានដឹកនាំដោយអ្នកភូតកុហក ចោរ និងឃាតក ប៉ុន្តែរឿងនេះនឹងឈានដល់ទីបញ្ចប់។ សូមកុំបោះបង់ ការពិតនឹងឈ្នះ»។
ដោយមានមូលដ្ឋានស្ថិតនៅក្រៅប្រទេសរុស្ស៊ី លោកស្រី Navalnaya បានប្តេជ្ញាបន្តការងាររបស់សពប្តីលោកស្រី គឺលោក Alexei Navalny ដែលបានទទួលមរណភាពក្នុងមន្ទីរឃុំឃាំងអាក់ទិក កាលពីថ្ងៃទី១៦ ខែកុម្ភៈ។ ហើយលោកស្រីបានចោទប្រកាន់លោក Putin ថា បានសម្លាប់ប្ដីរបស់ខ្លួន ប៉ុន្តែជាការចោទប្រកាន់ដែលវិមានក្រឹមឡាំងបដិសេធ៕