ក្រុមអ្នកជួយសង្គ្រោះ បានប្រញាប់ប្រញាល់ជម្លៀសប្រជាជន ដែលជាប់គាំងដោយទឹកជំនន់ដ៏បំផ្លិចបំផ្លាញនៅទូទាំងរដ្ឋភាគខាងត្បូងប្រេស៊ីល រីអូ ក្រានដេ ដូស៊ុល (Rio Grande do Sul) កាលពីថ្ងៃអង្គារ (០៧ ឧសភា) ដោយមនុស្សចំនួន ៩០ នាក់ត្រូវរាយការណ៍ថាបានស្លាប់ ខណៈអ្នករួចរស់ជីវិតបន្តអស់សង្ឃឹមក្នុងការស្វែងរកអាហារ និងការផ្គត់ផ្គង់ជាមូលដ្ឋាន ហើយមនុស្សរាប់សិបនាក់នៅតែបន្តបាត់ខ្លួន។
ទឹកជំនន់បានបង្អាក់កិច្ចខិតខំប្រឹងប្រែងជួយសង្គ្រោះ ដោយមនុស្សរាប់សិបនាក់នៅតែរង់ចាំការជម្លៀសដោយទូក ឬឧទ្ធម្ភាគចក្រពីលំនៅឋានដែលត្រូវបានជន់លិច។ ទូកតូចៗបានបើកឆ្លងកាត់តំបន់ទីប្រជុំជន ដែលប្រែក្លាយជាទន្លេ ដើម្បីស្វែងរកអ្នកនៅរស់រានមានជីវិត។
ទីភ្នាក់ងារការពារជនស៊ីវិលរបស់រដ្ឋបាននិយាយថា ចំនួនអ្នកស្លាប់បានកើនឡើងដល់ ៩០ នាក់ជាមួយនឹងការស្លាប់ចំនួន ៤ នាក់ផ្សេងទៀតកំពុងត្រូវបានស៊ើបអង្កេត ខណៈដែលមនុស្ស ១៣១ នាក់នៅតែមិនទាន់សង្រ្គោះបាន និងមនុស្សប្រហែល ១៥៥.០០០ ពុំបានផ្ទះសម្បែង។
ភ្លៀងធ្លាក់ខ្លាំងដែលបានចាប់ផ្តើមកាលពីសប្តាហ៍មុន បានបណ្តាលឱ្យទឹកទន្លេជន់លិចលើទីក្រុងជាច្រើននៃរដ្ឋនេះ និងបំផ្លាញផ្លូវថ្នល់ និងស្ពាន។ យោងតាមទីភ្នាក់ងារការពារជនស៊ីវិលរបស់ប្រទេសប្រេស៊ីល បានឱ្យដឹងថា ទឹកជំនន់ក៏បានជះឥទ្ធិពលដល់សេវាទឹក និងអគ្គិសនីផងដែរ ដោយមនុស្សសរុបជាង ១,៤ លាននាក់រងផលប៉ះពាល់៕