ក្រុមហ៊ុនបណ្ដាញសង្គម TikTok និងក្រុមហ៊ុនមេរបស់ចិន ByteDance បាន​ប្តឹង​ទៅ​តុលាការ​សហព័ន្ធ​សហរដ្ឋអាមេរិកកាលពីថ្ងៃអង្គារទី៧ឧសភា សប្ដាហ៍នេះ ដើម្បីព្យាយាម​ទប់ស្កាត់​ច្បាប់​ដែល​ចុះ​ហត្ថ​លេខាដោយលោកប្រធានាធិបតី Joe Biden ដែលនឹងបង្ខំឱ្យបិទ ឬលក់ App កម្មវិធី​វីដេអូ​កម្សាន្ត​ខ្លីៗមួយនេះ ដែលប្រើដោយពលរដ្ឋអាមេរិក ១៧០លាននាក់ ។ 

ក្រុមហ៊ុនទាំង២ បានដាក់ពាក្យបណ្តឹង នៅក្នុងសាលាឧទ្ធរណ៍ ស្រុក កូឡុំប៊ី របស់​សហរដ្ឋ​អាមេរិក ដោយលើកហេតុផលថា ច្បាប់​នេះ​បាន​រំលោភ​លើ​រដ្ឋ​ធម្មនុញ្ញ​របស់​សហរដ្ឋ​អាមេរិក​ដោយ​ហេតុផល​មួយ​ចំនួន​រួមទាំង​ការ​ប្រព្រឹត្ត​កំហុស​លើ​ការ​ការពារ​សិទ្ធិ​បញ្ចេញ​មតិ​ដោយ​សេរី​ នៃ​វិសោធនកម្ម​លើកទីមួយ។ ច្បាប់ដែលចុះហត្ថលេខាដោយលោក Biden កាលពីថ្ងៃទី ២៤ ខែមេសា ទុកពេលវេលាឱ្យ ក្រុមហ៊ុន ByteDance រហូតដល់ថ្ងៃទី ១៩ ខែមករា២០២៥ ដើម្បីលក់ TikTok បើពុំនោះ ប្រឈមនឹងការហាមប្រាមវត្តមានកម្មវិធីនេះ នៅលើទឹកដីអាមេរិក ។  

ក្រុមហ៊ុនទាំងនោះ បាននិយាយនៅក្នុងពាក្យបណ្ដឹងថា នេះជាលើកដំបូងក្នុងប្រវត្តិសាស្ត្រ ដែល​សភា​សហរដ្ឋអាមេរិក បានអនុម័តច្បាប់មួយដែលកំណត់វេទិកាបណ្ដាញសង្គមបែបនេះ ជាការ​ហាម​ប្រាម​ទូទាំងប្រទេសជាអចិន្ត្រៃយ៍។

ពាក្យ​បណ្ដឹងខាងលើនេះ បាននិយាយថា ការបិទApp នេះ គឺមិនអាចទៅរួចទេ ទង្វើនេះ មិន​មែន​ពាណិជ្ជកម្ម មិនមែនបច្ចេកវិទ្យា មិនមែនជាករណីស្របច្បាប់ និងមិនមានចម្ងល់ទេ ពោលគី ច្បាប់ ដែលនឹងបង្ខំឱ្យបិទ TikTok ត្រឹមថ្ងៃទី១៩ ខែមករា ឆ្នាំ ២០២៥ ប្រៀបបាន​នឹង​ការ​បំបិទ​មាត់​ប្រជាជនអាមេរិកប្រមាណ១៧០លាននាក់ អ្នកដែលប្រើ​វេទិកា​ទំនាក់​ទំនង​ក្នុង​វិធី​ដែល​មិន​អាច​ចម្លង​ពីកន្លែងផ្សេងបាន។ សេតវិមាន បាននិយាយថា​ខ្លួន​ចង់​មើល​ឃើញ​កម្ម​សិទ្ធិ​ដែល​មាន​មូលដ្ឋាន​នៅ​ចិនត្រូវបានបញ្ចប់ដោយហេតុផលសន្តិសុខជាតិ ប៉ុន្តែមិនមែនជាការហាមប្រាមលើ TikTok នោះទេ។ សេតវិមាន និងក្រសួងយុត្តិធម៌ បានបដិសេធ​មិន​ធ្វើ​អត្ថា​ធិប្បាយ​លើ​បណ្តឹង​នេះ​៕