រដ្ឋមន្ត្រីការបរទេសសហរដ្ឋអាមេរិក លោក Antony Blinken បានជួបជាមួយប្រធានាធិបតី ប្រទេស កាតេម៉ាឡា លោក ប៊ឺដាដូ អារ៉េវ៉ាឡូ(Bernardo Arevalo) ដើម្បី​ពិភាក្សា​អំពី​បញ្ហា​អន្តោ​ប្រវេសន៍​នៅ​ក្នុងទីក្រុងប្រទេសកាតេម៉ាឡា កាលពីថ្ងៃអង្គារ។

លោក Blinken បាននិយាយថា សហរដ្ឋអាមេរិក កំពុងបង្កើនកិច្ចខិតខំ​ប្រឹងប្រែង​ទ្វេដង ដើម្បី​ការពារ​ពលករចំណាកស្រុកពីការកេងប្រវ័ញ្ច ហើយសហរដ្ឋអាមេរិក កំពុងចូលរួមក្នុង​គំនិត​ផ្តួច​ផ្តើម​ជ្រើសរើសពលករដោយយុត្តិធម៌របស់អង្គការពលកម្មអន្តរជាតិ។

លោក Arevalo បាននិយាយថា ការធ្វើចំណាកស្រុកដ៏ច្រើន គឺជាបាតុភូតមនុស្ស ដែលធ្វើឲ្យ​ប៉ះពាល់​ដល់ជីវិតរបស់មនុស្ស។

លោកបាន​និយាយបន្ថែមថា នៅពីក្រោយតួលេខនៃលំហូរការធ្វើចំណាកស្រុក មានរឿងរ៉ាវ​រាប់​លាន​នៃ​គ្រួសារបែកបាក់គ្នា ការខូចចិត្ត កុមារនិងស្ត្រីប្រឈមទៅនឹងអំពើហិង្សា និងការរំលោ​ភ​បំពាន​គ្រប់​បែបយ៉ាងនៅក្នុងប្រទេសដែលពួកគេឆ្លងកាត់។

ក្រសួងការ​បរទេសអាមេរិក បាននិយាយថា លោក Blinken បានជួបជា​មួយ​ប្រធានាធិបតី​ប្រទេស​កាតេ​ម៉ាឡា និងមេដឹកនាំដ៏ទៃទៀត ដើម្បីពិភាក្សាពីការអនុវត្តន៍ ការគ្រប់គ្រងការ​ធ្វើ​អន្តោ​ប្រវេសន៍ និងសមាហរណកម្មជនភៀសខ្លួន។